જયંત ડાંગોદરા ~ આવ પલળીએ & એટલે ઉપચારથી * Jayant Dangodara  

*****

*આવ પલળીએ*

આવ પલળીએ,
એકમેકમાં ઘૂઘવતાં આ ચોમાસાને મળીએ.
આવ પલળીએ.

પરબીડિયાનું વાદળ ગમતાં સરનામાને તલસે,
બીજ અષાઢી આવે ને મન વ્હાલું વ્હાલું કણસે,
બારસાખને પકડી આંખો શ્રાવણ થઈને વરસે,
વરસે નહીં તો ડૂમાને કોઈ ઘંટી વાટે દળીએ.
આવ પલળીએ.

લવિંગ કેરી લાકડીએ હું પરપોટાને તોડું,
ઈચ્છાઓની બંધ પોટલી ચોક વચાળે છોડું,
તમે કહો તો શેરી આખી માથે લઈને દોડું,
કુંવારી આંખ્યુંનાં વ્રતને સૌની સામે છળીએ.
આવ પલળીએ.

~ જયંત ડાંગોદરા

ચોમાસું બે કાંઠે વહી રહ્યું છે ત્યારે આવું ગીત મનને ભીંજવી જાય…

કવિ : જયંત ડાંગોદરા * ફૂલોની પાંખ પર * રીડજેટ 2015