🔆હાલરડું ~ હાલાં રે હાલાં🔆

હાલાં રે હાલાં બેનીને વાલા, મીઠા હાલાની વાહ રે વાહ
હાલાં રે હાલાં બેનીને વાલા, મીઠા હાલાની વાહ રે વાહ

નાહી કરીને બેનીને રે સુતા, નાહી નાહી કર્યાની વાહ રે વાહ
દુધડાં બેનીને બહુ બહુ ભાવે, મીઠા દુધડાંની વાહ રે વાહ

બેનીને ઘોડલિયું બહુ બહુ ગમતું, રંગીન ઘોડિયાની વાહ રે વાહ
બેનીને ખોયું ભાઇ કેવું ગુલાબી, ગુલાબી ખોયાની વાહ રે વાહ

ઘોડલિયા ઉપર ઝુમ્મર લટકંતા, ફરફર ઝુમ્મરિયાની વાહ રે વાહ
ઝુમ્મરમાં લટકે રંગ રંગ વાદળિયા, રંગોના રાજાની વાહ રે વાહ

ઘોડિયા ઉપર ઝુમ્મર લટકંતા, રુડા પંખીડાની વાહ રે વાહ
ચકલી ને પોપટ મેના કબુતર, ઉડતા પંખીડાની વાહ રે વાહ

ઘોડિયા ઉપર તારલા ટાંક્યા, ઝગમગ તારલિયાની વાહ રે વાહ
ઘોડિયા ઉપર આભલિયા ટાંક્યા, ચાંદા ને સુરજની વાહ રે વાહ

ઘોડિયું ઝુલતું કેવું મજાનું, ઝૂલણ ઝૂલાની વાહ રે વાહ
બેનીને નીંદરડી જલ્દી રે આવે, મીઠી નિંદરની વાહ રે વાહ

દીકરીનાં સપનામાં પરીઓ આવતી, પરીઓની પાંખોની વાહ રે વાહ
દીકરી સુવે ને વહાલી રે લાગતી, મીઠડી દીકરીની વાહ રે વાહ

~ લતા હિરાણી

🙏🏻આપ ‘કાવ્યવિશ્વ’ના નિયમિત મુલાકાતી છો. આપ આ સાઇટ subscribe કરો એવી અપેક્ષા. આભાર. 🙏🏻