🔆વિવેક ટેલર ~ માથે-મોઢે🔆

માથે-મોઢે રૂમાલ બાંધીને
દિવાળીની સફાઈ કરવા હું માળિયામાં પેસી.
કરોળિયાના જાળાઓમાં શિકાર થઈ ગયેલાં
મારા ગઈકાલનાં વર્ષોનાં કંકાલ ઝૂલી રહ્યાં હતાં.
એક પલવડી ધ્યાનભંગ થઈ અને ભાગી ગઈ,
મારાં સ્વપ્નોનાં કટાઈ ગયેલાં વાસણોનાં ઢગલા પાછળ.
મારી પિયરની નેઇમ-પ્લેટ પર
તૂટી ગયેલાં જહાજોનાં દિશાહીન ભંગારનો ભૂકો ફરી વળ્યો હતો.
કરચલીઓનાં કાટમાળ પછવાડેથી
જડી આવ્યું એક આલબમ.
એને ખંખેરતાં જ
પડળ પર પડળ થઈ ચડી ગયેલાં સંબંધોએ
આખા માળિયાને તરબતર કરી દીધું…
અંતરસના અવાવરૂ કૂવા મારી ભીતર જોરશોરથી
ફાટી ગયેલા અવાજોના જિન્ન સમા પડઘાવા માંડ્યા
અને નાની-શી તિરાડમાંથી
બિલ્લીપગલે ઘૂસી આવેલ તડકાનો રૂમાલ
અચાનક મારામાંથી ઓગળીને
આલબમ પર પડેલ એક ટીપાને લૂછવા માંડ્યો.
આલબમના પહેલાં જ પાનાં પર
અમારા હનીમૂનનો ફોટો ચોંસઠ દાંત ઊઘાડીને બેઠો હતો…..

~ વિવેક મનહર ટેલર

દિવાળીની સફાઈ વીતેલા વર્ષોના સ્મરણ-જાળાં સાફ કરે ત્યારે મન અવાચક થઈ જાય. એક પુરુષ આ બાબતને આટલી સૂક્ષ્મ રીતે વિચારી શકે ને એમાં નર્યા નીતર્યા સંવેદનો ઝીલી શકે એ ખાસ રણઝણાવતી બાબત છે ને !    

દિવાળીની સફાઈ, હજારો વર્ષોથી લાખો ગૃહિણીઓ કરતી આવી છે. જરૂરી નથી કે એ માત્ર ભૌતિક હોય. સાફ, ચોખ્ખું, ચમકતું ઘર મનને પણ અજવાળી દે ! સ્ત્રી પોતાના ઘર સાથે સંપૂર્ણપણે જોડાયેલી હોય છે. એના માટે ઘરની દીવાલો કે રાચરચીલું માત્ર જડપદાર્થો નહીં પણ પોતાની સાથે શ્વાસ લેનારા તત્ત્વો હોય છે. એની ખુશી અને આંસુ આ દિવાલોએ ઝીલેલા હોય છે. તેની હથેળીઓએ ઘરના સામાન અને ચીજવસ્તુઓના ધબકારા અનુભવ્યા હોય છે. ઘરના સભ્યોની આવનજાવન ચાલતી રહેતી હોય છે જ્યારે ઘરમાં રહેલી ચીજવસ્તુઓ એની સદાસંગાથી હોય છે જેની સાથે એ કદીક વાત કરે છે તો કદીક પોતાનો રોષ, ચીડ પણ ઠાલવે છે.

એટલે જ અહીં માળીયા પર ચડાવાયેલી તમામ ચીજો કશાક દુખ કે ક્યાંક સુખનું પ્રતીક બની જાય છે. કટાઈ ગયેલા વાસણો કે પિયરની નેમ પ્લેટ એક જુદા ભાર હેઠળ નાયિકાને ઘેરે છે તો જડી આવેલું ફોટો આલ્બમ એના મનને તરબતર કરી દે છે. અહીં સંબંધો પર વિશેષ વજન છે અને એ વાત સ્પર્શી જાય છે. વર્તમાન સાફ કરવા ભૂતકાળની બારીઓ બંધ કરી દેવી પડે છે. કોણ જાણે કેટલાય જખમો ને એના અવશેષો કરોળિયાના જાળાની જેમ લટકતા હોય ! કેટલીય યાદોના કંકાલો ઢગલો થઈને પડ્યા હોય ! 

‘કાવ્યવિશ્વ’ને આવકાર

તમે આ છપ્પનભોગનો રસથાળ મોકલાવો છો એ માટે હું ઋણી છું. હરરોજ ઉત્તમ કાવ્યો પીરસવા બદલ વંદન. ‘કાવ્યવિશ્વ’ને જે ઊંચાઈ બક્ષવાની તમારી સંકલ્પનાઓ સાકાર થાય તેવી શુભેચ્છાઓ. ~ કિશોર બારોટ
આપ પણ ‘કાવ્યવિશ્વ’ માટે આપનો પ્રતિભાવ મોકલી શકો છો.    

🌹દિનવિશેષ 3 નવેમ્બર 🌹 

જ્યોત સંકોરવાની છે