🔆ભાગ્યેશ જહા ~ હળવેથી રોજ તમે🔆 -

હળવેથી રોજ તમે વરસ્યા કરો છો હવે ધોધમાર વરસો તો કેવું ?
બારી ઉઘાડીએ તો આવે અજવાળું હવે, બારણું ઉઘાડો તો કેવું ?

ભીના અજવાળાને ઓરડામાં રાખીએ તો વરસે તે સમણાના ઝાંપે,
ખૂણામાં સંતાડો અંધારું ચોમાસે, જાગેલા દીવાથી કાંપે, –
દીવાની ઘટનાને જન્મોથી પ્રગટાવો, ખુદ તમે પ્રગટો તો કેવું?
બારી ઉઘાડીએ તો આવે અજવાળું, હવે બારણું ઉઘાડો તો કેવું?

ધારો કે ફૂલ નામે ઊગે સરનામું અને પીળી સુવાસ નામે શેરી,
ગામ એનું ધોધમાર વરસાદી ઝાપટું ને સૂકવેલી લાગણીઓ કોરી,
ચોમાસે લાગણીઓ કેમે સુકાય નહીં, તડકો થઈ આવો તો કેવું ?
હળવેથી રોજ તમે વરસ્યા કરો છો, હવે ધોધમાર વરસો તો કેવું ?

~ ભાગ્યેશ જહા

ઝંખનાનું ઝરમરતું ગીત.

સામે છે પણ પાસે નથી, સાથે નથી એના હળવા સુકારાનું ભીનું ગીત. જે જોઈએ છે એ ભરપૂર… ટુકડે ટુકડે કે થોડામાં સંતોષ નથી. હળવી ઝરમર નહીં, હવે તો જોઈએ ધોધમાર…. ભીનું નથી થવું, હવે તો ભીંજાવું છે….

અહીં કવિએ વિરોધાભાસ પણ આપ્યો છે. એક બાજુ ધોધમાર વરસાદની કામના અને બીજી બાજુ ભીની લાગણીઓને સુકવવા તડકાની ઝંખના… અલબત્ત તડકો હૂંફમાં તબદીલ થઈ શકે.

***

આજે સહુ સ્વનામ ધન્યતામાં પડ્યા છે ત્યારે એક સંપાદકીય ઉચ્ચ કોટિની સજ્જતા સાથે તમે ડિજિટલ મીડિયાને સાહિત્ય સેવાનું પ્રમુખ માધ્યમ માનીને જે કામ ઉપાડ્યું છે તે કોઈ એકલ વીરાંગનાથી થાય એવું નથી. હું આ ઉપક્રમ તરફ બહુ જ સન્માનથી જોઉં છું. ~ દિલીપ ભટ્ટ (વરિષ્ઠ પત્રકાર : ગુજરાત સમાચાર)

***