🔆સુરેન ઠાકર ~ અમે🔆

અમે ઓશિયાળા નયનના સહારે, ગહન કંઇક ઘેરા જખમ લઈને આવ્યા
અમે આયનાઓના નગરોની વચ્ચે, સદીઓ પુરાણો અહમ લઈને આવ્યા

રખે કોઈ આવે રખે કોઈ ના’વે, અમારે તો આઠે પ્રહર છે પ્રતીક્ષા
અમે તો અનાદિ યાચકને પાછા, પ્રણય નામનો એ ધરમ લઈને આવ્યા

અમે રાજયોગી ભરથરીનું સપનું, અમે પિંગળાના કરમનું અમર ફળ
અમે લક્ષચોરાશી ફેરા ફરીને, ફરી એ જ પાછો જન્મ લઈને આવ્યા

અમે ક્યાંક ઘેઘૂર થઈને ઘૂંટાયા, અમે ક્યાંક અડધોઅડધથી ચૂંટાયા
ગમે તે દશામાં અસલ તેજ રાખ્યું, અમે કંઈક એવો નિયમ લઈને આવ્યા.

ઓલિયા ભક્ત નરસૈયા જેવા; જીવ્યા જળ કમળવત, મર્યા મુક્ત રાહે
અમે ઓગળીને અકિંચન થયા પણ, અમે શબ્દશબ્દે મરમ લઈને આવ્યા

ઘણી વાતમાં સ્પષ્ટ થાવાનું મુશ્કિલ, ઘણી વાતમાં મૌન રહેવું એ મુશ્કિલ
સમયને ઉચિત જે મલાજો નિભાવે, અમે ખાનદાની શરમ લઈને આવ્યા.

~ સુરેન ઠાકર ‘મેહુલ’ (30.7.1942-27.7.2022)

***
આપની વાર્તાઓમાં કાવ્યનો સુંવાળો સંસ્પર્શ જે અનુભવાય છે તેનું પગેરું આ ‘કાવ્યવિશ્વ’માંથી જડી ગયું. કાવ્યના દરેક અંગને પૂરતું વજન આપીને આપે જાણે કે કવિતાનો ઉદ્યાન ભાવકો પાસે બહુરંગી છોળો સાથે ખુલ્લો મુકી દીધો.- રજનીકુમાર પંડ્યા
***

🌹દિનવિશેષ 30 જુલાઈ🌹