🔆રામચંદ્ર બ. પટેલ ~ તમે પ્હેલાંવ્હેલાં🔆

તમે પ્હેલાંવ્હેલાં મુજ સમય મોંઘો બની અહીં
વહી આવ્યાં ત્યારે જડ પથર હું ઉંબર હતો
પડેલો દ્વારે : ત્યાં કુસુમ સરખા કંકુપગલાં
અડ્યાં; જાગી ઊઠ્યો તરત થઈને મોર કલગી

જઈ બેઠો સાખે : પછી નીરખું તો તોરણ તમે
રહ્યાં મ્હેકી… પાછો હું સરકી જઈ કુંજર સમ
થયો પાણિયારું… ઊતરડ બની તામ્રવરણી
ઊગી મોરી ઊઠ્યાં, ઝગુમગું થઈ ચોક ટહુક્યો.

વલોણું, સાંબેલું, જલ-સભર બેડું, વળગણી,
તવી, ચૂલો, ઘંટી, વળી દહીંની દોણી, નીસરણી.
બધાંની વચ્ચે તું ઊજળું ઊજળું છાપરું થઈ
ઠરે એ પ્હેલાં તો ઊતરી ગઈ લૂખા લીંપણમાં…

હવે તું લોહીમાં હલીચલી પછી લિસ્સું સરતી
ચિતા બે આંખોની નિત સળગી ચિત્કાર ભરતી.

~ રામચંદ્ર બ. પટેલ ‘સુક્રિત’ (01.08.1939)

ગુજરાતી કવિ, નવલકથાકાર અને ટૂંકી વાર્તા લેખક છે.

રામચંદ્રભાઈનું લેખન તેમના ગ્રામીણ જીવન, કુદરત અને કૃષિ સાથેના ગાઢ સંપર્કથી પ્રભાવિત છે. તેમના ત્રણ કવિતા સંગ્રહ છે, ‘મારી અનાગસી ઋતુ’ (૧૯૭૭), ‘પદ્મનિદ્રા’ (૨૦૦૧), ‘સીમાંતર’ (૨૦૧૩)

તેમણે અગિયાર જેટલી નવલકથાઓ લખી છે. ત્રણ ટૂંકીવાર્તાના સંગ્રહો છે. વર્ષ ૨૦૦૪માં તેમને કુમાર સુવર્ણ ચંદ્રકથી નવાજવામાં આવ્યા હતા.
***
‘કાવ્યવિશ્વ’ એક ધ્યાન ખેંચે તેવું સાહિત્યિક, સાહિત્યપ્રેમીઓમાં લોકપ્રિય સાહસ છે. વિવાદ અને વ્યર્થ વ્યવહારોથી દૂર રહીને લતાજી આ પ્રયાસ કરી રહ્યા છે. શુભેચ્છાઓ. ~ વિષ્ણુ પંડ્યા, પૂર્વ અધ્યક્ષ, ગુજરાત સાહિત્ય અકાદમી
***

🌹દિનવિશેષ 1 ઓગસ્ટ🌹

બાળક અને શાળા