🔆પ્રતાપસિંહ ડાભી ~ અલગ છે અસ્મિતા🔆 -

લાંબો ભલે ન ડગલો, મૂછો ન વાંકડી છે
એનો એ દબદબો, છો’ શિર પર ન પાઘડી છે

દુનિયાનો એક ખૂણો એવો કોઈ બતાવો
ગુજરાતીએ જ્યાં જઈને, ખોલી ન હાટડી છે

મહેણાં ઘણાંય ભાંગ્યા, બાકી યે ભાંગવાનો
સેના ને ખેલ નામે, સીડીઓ સતત ચડી છે

દરિયાનો કાંઠો લાંબો, દરિયાદિલી ય પ્હોળી
મા ભારતી સ્મરે ત્યાં, પહોંચ્યો એ તત્ઘડી છે

અહીંયા જુઓ અમસ્તા વનરાજ ના વસે છે
ખુદના સમી જ રૈયત એનેય સાંપડી છે

દુનિયાની સૌથી ઊંચી મૂર્તિએ બેસનારો
સરદાર નામનો જણ ગુજરાતની મૂડી છે

મૃગજળ ને રેત- ઢુવા, જોયાં ભલે ઘણાં રણ
જોયું જો શ્વેતરણ તો માનો કે ધનઘડી છે

જણતી રહે આ ભૂમિ, શૂરવીર સંત દાતાર
કોઈ પાળીયાની મૂરત હર પાદરે ખડી છે

દસ બાર ગાઉ ચાલો, હરિહરનો સાદ સુણો
પાવન ધરા ઉપર અહીં એવી જગા પડી છે

બાવન પીઠે ધબકતાં અવયવ અલગ ઉમાનાં
અંબાજીમાં હૃદયના ધબકારની ઝડી છે

જ્યોતિર્લિંગોની જાતર ‘હાકલ’ જવાને નીકળ્યો
શિવસોમનાથ ધામે પહેલી પ્રથમ કડી છે

~ પ્રતાપસિંહ ડાભી ‘હાકલ’

આજે વિશ્વગુજરાતી દિન… અને કવિ ‘હાકલ’નું આ ગીત અને ગુજરાતી હોવાનું ગૌરવ માણો.

🙏🏻આપે ‘કાવ્યવિશ્વ’ની મુલાકાત લીધી, આભાર. પ્રતિભાવ લખશો ને! અને આ સાઇટ subscribe જરૂર કરશો.🙏🏻

‘કાવ્યવિશ્વ’ વિશે વિદ્વાનોના પ્રતિભાવો

ગુજરાતી કવિતાનો એન્સાયક્લોપીડિયા આપ તૈયાર કરી રહ્યા છો. ભવિષ્યમાં ગુજરાતી કવિતામાં કોઈને કંઈ પણ શોધવું હોય તો કાવ્યવિશ્વમાંથી મળી રહેશે એટલો અદભૂત ખજાનો ભેગો થાય છે. નક્કી આ એક e-સંદર્ભ ગ્રંથ બનશે. ~ સુરેશ પટેલ