🔆હરીશ શાહ ~ પછી આપી દો🔆 -

પછી આપી દો મનદુઃખને મ્હાત…
આગંતુક અવસરની અટકળ વધાવીને લંબાવો સંગાથે હાથ…

ભારણના ભરડાને નાથો કે હાથ વ્હેંત સામે તો ઊભું છે સુખ
એનાં ઊંબર પછી કૂદો તો પામો છો દરિયાઓ સપનાનાં જૂજ,
પછી હાથ વ્હેંત સાગર છે સાત!
પછી આપી દો મનદુઃખને મ્હાત…

આકાશે ઉડવું છે પાંખો પ્રસારીને? જાણી લો નકશો ના આભે,
જોડી લો શમણાંને હમણાં એ બેઠાં છે ઇચ્છાની મંજિલના ધાબે.
પછી દોરાણી આંગણિયે ભાત!
પછી આપી દો મનદુઃખને મ્હાત…

~ હરીશ શાહ

વાત તો એ જ છે, જૂની ને જાણીતી, સરળ ને સ્વીકાર્ય પણ એની કવિતાનું પોત મજાનું બન્યું છે.

આજના સમયમાં ‘ભારણના ભરડા’થી મુક્ત માનવી જડવો મુશ્કેલ છે! સૌ સમજે છે કે આ ભાર ફગાવી દઈએ તો કેવી નિરાંત પણ સુખ, લાકડી બાંધેલા પેલા ગાજર જેવું છે. ગધેડો દોડ્યા જ કરે અને લાકડીનું ગાજર એના હાથમાં જ ના આવે!

ઇચ્છાની મંઝીલના ધાબે બેઠેલા શમણાંને પામવા આકાશે આંખ માંડવાની જરૂર ક્યાં? આ શમણાં બાજુમાં જ છે, એક એક કરીને ધાગે પરોવી લો.

પ્રોત્સાહક એટલે કે મજાની મોટીવેશનલ કવિતા.

‘કાવ્યવિશ્વ’ને આવકાર

આપના પ્રયત્ન અને મહેનત માટે વંદન. Lataben, salute to your efforts. ~ નમ્રતા શોધન