🔆નેહા પુરોહિત ~ બાગ છે🔆

બાગ છે, નિરાંત છે, સાચ્ચે ! છતાં હું એકલી,
લાકડી, ને બાંકડો સાથે, છતાં હું એકલી.

ડામવા એકલતા મેં વાવી ફૂલઝરતી લતા,
જીવ પર જઈ મ્હોરતી રાતે, છતાં હું એકલી..

સૂર્યનો દીવો કરી ઈશ્વર નિહાળે છે મને,
તારલા તોડી મને આપે, છતાં હું એકલી..

શબ્દને સાથી કરું, સૂરની કરું સંગત પછી
ગણગણી લેતી ગઝલ જાતે.. છતાં હું એકલી..

ટોળું પણ ટોળે મળી આ જાદુ જુએ છે સતત,
એ બધાં કાયમ છે સંગાથે, છતાં હું એકલી!

~ નેહા પુરોહિત

‘એકલી’નો ભાવ અહીં એકાંતનો ઉત્સવ માણે છે. સર્જકનો આ વિશેષાધિકાર છે. સર્જક અને એકાંત એ એક સિક્કાની બે બાજુ. એક વગર બીજું નહીં. અલબત્ત તોયે સર્જકને કદી સંગાથની, સખીની, મેળાની જરૂર લાગે. એય માણસ છે. એટલે કદીક આવા ભાવો જાગે એ ખરું.

પણ આ ગીતની અંતિમ પંક્તિ જુઓ,  
‘એ બધાં કાયમ છે સંગાથે, છતાં હું એકલી!’

આ છે અંદર સતત રમતો ભાવ. સર્જકને સંગાથ એકાંતનો જ હોય, એને એ જ ખપે. શબ્દો એના સાથી બને, સૂર એને સંગત આપે અને હોઠ ગણગણી લે ગઝલ….. તે છતાં હું એકલી. આસપાસ ટોળાં હોય કે મેળો, સર્જક પોતાનું એકાંત શોધી શકે. અને જો એને એકાંત ન મળે તો એના માટે પરિસ્થિતી અસહ્ય બની જાય!

આ એકાંતપ્રિયતા લોકોને સમાજને સમજાય નહીં. એટલે ‘એકલસૂરી’ કે એવાં અનેક ઉપનામો અપાય. આ પણ દરેક સર્જકનો અનુભવ હશે… પણ સમજાવવા જવાતું નથી. એકાંત કેમ ગમે છે, એ સમજાવવું શક્ય પણ નથી. એકાંત હૃદયમાં કેવી ભરતી લાવે છે એ બીજાને વર્ણવવું અશક્ય છે. એ તો છે, ‘ગૂંગાનો ગોળ’! માત્ર અનુભવ અને અનુભૂતિ જ…..  

‘કાવ્યવિશ્વ’ને આવકાર
ખૂબ સુંદર. લતાબેન અહીં મુકાતી પ્રત્યેક કૃતિ સરસ છે. તમે મૂકેલી ઓડિયો, વિડીયો ક્લીપ્સ પણ… વાહ, ક્યા બાત ! એમાંય ગાલિબની વિડીયો ક્લિપ… લોકગીતથી લઈને ગઝલ, ગીત, અછાંદસ બધું જ અહીં પીરસાયું છે… મજા આવી ગઈ. ~ રન્નાદે શાહ
(આપ પણ ‘કાવ્યવિશ્વ’ વિશે આપનો અભિપ્રાય મોકલશો તો ગમશે.)  

🌹જન્મદિનવિશેષ 19 સપ્ટેમ્બર🌹 

અઢળક આશીર્વાદ