🔆રઈશ મનીઆર ~ ચાલું છું🔆

ચાલું છું પણ સફરમાં જરા છું, જરા નથી
છું કેદ, તોય ઘરમાં જરા છું, જરા નથી.

એવીય છે ગતિ, જે વહે બાળપણ તરફ
વધતી જતી ઉંમરમાં જરા છું, જરા નથી.

વેરાઈ આમતેમ જરા હળવો થાઉં છું
આ દેહની ભીતરમાં જરા છું, જરા નથી.

સંપૂર્ણ લક્ષ પણ નથી, અવગણના પણ નથી
ઈશ્વરની પણ નજરમાં જરા છું, જરા નથી.

પીડા તો થાય છે છતાં છે સ્મિત હોઠ પર
છેદ્યું તમે એ થરમાં જરા છું, જરા નથી.

પ્રત્યેક રાતે મરતો રહું છું જરાજરા
હર ઊગતા પ્રહરમાં જરા છું, જરા નથી.

ફૂટેલા લીલા ઘાસમાં મારો જ અંશ છે
દાટ્યો’તો એ કબરમાં જરા છું, જરા નથી.

~ રઈશ મનીઆર

પ્રતીકો અનેક છે, સૂર એક છે. આજની ઘડીમાં રહેવું અઘરું છે.

સંતો, ચિંતકો એક જ વાત કરે છે, ‘વર્તમાનમાં રહો’ પણ આ અત્યંત અઘરું છે. મન કદીયે પૂરેપૂરું આ ક્ષણમાં હોતું જ નથી. કાં એ અડધું ભૂતકાળમાં કાં અડધું ભવિષ્યના સપનાંમાં કે ચિંતામાં. મનને એક સ્થળે, એક સમયે 100% રહેતાં આવડતું જ નથી! એટલે એને ખુશી સાથે ગમ જોડાયેલું રહે છે. ગમ સાથે ચિંતા અને ચિંતાની સાથે નવી આશા. એ નથી તો પૂરું પામી શકતું, નથી પૂરું છોડી શકતું.

પણ આ માનવજાતની સમસ્યા છે….. હલ શોધવા કરતાં જાતને સમજવી, ઓળખવી વધુ જરૂરી છે.   

‘કાવ્યવિશ્વ’ને આવકાર

‘કાવ્યવિશ્વ’ની મુલાકાત લીધી. વર્ષા દાસ, પન્ના નાયક, અનિલ ચાવડાની કવિતાઓ હૃદયસ્પર્શી. બીજા શિરમોર કવિઓની કવિતાઓ પણ વાંચી. આનંદ આવ્યો. ~ અનિતા તન્ના

🌹જન્મદિનવિશેષ 25 સપ્ટેમ્બર🌹 

પપ્પા