🔆રક્ષા શાહ ~ આતંકીથી જગત🔆

યુદ્ધ (સોનેટ)

આતંકીથી જગત જનને કાળ માપી રહ્યો છે,
ઘેરી લીધાં જલ, થલ,નભે યુદ્ધમાં સૈનિકોએ.
આવે ટાણે નૃપ,ગરીબ સૌ વૃદ્ધ ને બાળ ધ્રૂજે,
ના કો’ માથા પર છતર ને તોપ ને બોમ્બ ફૂટે.

શુરા એનાં ટપટપ ઢળે ચુંમતા ભૂમિ પ્યારી,
મારો,ફોડો ગગન ગજવે દેહ પે ઘાવ ઝાલી.
સંકેલી લો ધસમસ થશે વિશ્વ આખું ઘડીમાં,
સાથે રે’તા અવની પરના માનવીની દયામાં.

આતંકીનો જનગણ અહીં ક્રુરતાથી ભરેલો,
મંત્રીઓ સૌ ફરજ પરથી માર્ગ શોધે દશાનો.
થોભી જાઓ લથબથ થયાં દેશ બે વિશ્વમાં રે,
ઈચ્છે છે સૌ ગદગદ થઈ યુદ્ધ લાબું ન ચાલે.

એવું લાગે કમનસીબથી યુદ્ધ ત્રીજુંય થાશે,
પંચાંગે આ દિન દિન પછી દીન જેવા છપાશે.

~ રક્ષા શાહ

‘કાવ્યવિશ્વ’ને આવકાર

ખુબ સરસ રચનાઓ માણવા મળી. લતાબેન અભિનંદન આપને, આટલા સરસ કવિઓ અને તેમની રચનાઓને માણવાનું એક સરસ પ્લેટફોર્મ પૂરુ પાડ્યું.. સાભાર વંદન ~ ઉર્વી પંચાલ

🌹દિનવિશેષ 1 ઓકટોબર🌹