🔆ઉદયન ઠક્કર ~ કોઈએ કહ્યું છે🔆

કોઈએ કહ્યું છે :
માણસ જન્મે ત્યારે તેનું લગ્ન પણ નક્કી થઈ જાય છે
મરણ સાથે.
આમ કહેનારનો સંકેત મરણની સુંદરતા તરફ હશે
કે લગ્નની ભયંકરતા તરફ?

‘મરવું’માંથી વાસ આવે છે
બાકસમાં પુરાયેલા કાનખજૂરિયાની,
કોહવાતા લાકડાની,
મરઘાના ખાતરની,
વરસોથી ન ખૂલેલા, હવડ, હવાબારી વગરના સંબંધની,

લોટામાં ચાર પાન મૂકો સાહે…બ, કાંઠલે દોરો બાંધો,
હવે શ્રીફળ પધરાવો, ચાર બાજુએ ચાર ચાંદલા કરો,
અક્ષત લગાડો, હાથમાં ઊંચકીને ત્રણ વખત માથે અડાડો,
કુંભે વરુણમાવાહયામિ સ્થાપયા…મિ…’—ની વાસ આવે છે
‘મરવું’માંથી.

કૂંપળમાંથી કોલસો
વ્હેલમાંથી તેલ
– કેવા કેવા વેશ કાઢે છે, આ ‘મરવું’

ફાન્સવાળાઓએ કાચી કુમળી વયે બાંધીને બાળ્યું,
પારધીવાળાઓએ અંગૂઠે વીંધ્યું.
ગ્રીસવાળાઓએ પ્યાલી પાઈ,
યહૂદીવાળાઓએ ખિલ્લે ઠોક્યું.
તોયે સાલું હેં હેં કરતું ઊભું જ છે, અમર,
આ ‘મરવું’

જોઈએ ત્યારે મારું વા’લું ન મળે,
આડે હાથ મુકાઈ જાય.
ગોતો કેરોસીનના બળબળતા ઉજાસમાં,
રેલવેના આટેપાટે,
છલકાવો ટીક-ટ્વેન્ટી ઑન ધ રૉક્સ,
એકવીસ માળ બાવીસ વાર ચડો
ને ઊતરો,
પણ ગુમ.

‘ઠીક ત્યારે, જેવી હરિ ઇચ્છા’ કહીને મન મનાવી લો
ત્યાં જ હસતું હસતું
તમારી બગલમાં સોપારીની જેમ ઊપસી આવે
અને પૂછે,
‘હાઉક! મને ગોતતા હતા?’

~ ઉદયન ઠક્કર

મરણ કે જે સૌના લલાટે અમર થઈને લખાયું છે, જેનો કોઈ વિકલ્પ નથી એને ધારદાર રીતે આલેખ્યું છે કવિએ!  
જરા હાસ્ય પણ નિપજાવ્યું છે, ‘મરણની સુંદરતા’ કે ‘લગ્નની ભયંકરતા’ કહીને !  

‘મરણ’ આ શબ્દ કોઈને ગમે એવો નથી. ગંધાતો, વાસ મારતો…..  અને એની વિધિની તો વાત એવા સમયે જ કરાય…..

કેટલા સંદર્ભો વેર્યા છે કવિએ! શ્રીકૃષ્ણથી માંડીને ઇસુ ખ્રિસ્ત સુધી…..

જબરો કટાક્ષ અને બહુ કરૂણ કટાક્ષ હવે આવે છે. મરવા માટે કેરોસીન કે રેલવે કે ટીક ટ્વેન્ટી કે એકવીસમો માળ – કશું જ કામ ન લાગે અને કોઈ પોતાની જીવવાની ઈચ્છા સમેટી પાછા વળી જાય ત્યાં એ કેંસરની ગાંઠ બનીને ટપકે!!! ઓહ….

મારિયા કોરિના અને માનવઉત્કર્ષ