🔆સમીર ભટ્ટ ~ તારી બબ્બે આંખોથી🔆

તારી બબ્બે આંખોથી તું
એકધારી પીધા કરે છે સઘળું.

તેં રચી છે તારી પોતાની ભાષા
તારા પોતાના અરથ -થી સમૃદ્ધ.
નાનકડા ફ્લેટમાં તું ચાલે છે
ત્યારે પદરવથી રચાય છે
તારો પોતીકો શબ્દકોશ.
અમે ક્યારેક જ અડધું પડધું 
સમજી શકીએ છીએ એમાંથી…

તારી માતાના હરખનો પાર નથી.
તને નવી નવી રીતે સજાવ્યા કરે છે.
તું
એનું મન રાખતી હો તેમ 
નવું ફરાક પહેરી
એકાદ ફોટો પડાવી
તારામાં પાછી વળી જાય છે.

ચીલાચાલુ ગુજરાતી ગરબો
મ્યુઝિકસિસ્ટમમાં ઓન કરી
તારું કુટુંબ તારી ફરતે 
ગોળાકાર ઊભું રહી તાકતું હોય છે
ત્યારે તારા પગની એક ઠેકથી 
આરંભાય છે નિત્ય નૂતન રાસ…

તે સમે ડ્રોઈંગ રૂમમાં ચંદ્ર ઉગી નીકળે છે.
તારો પિતા
તને બગીચામાં ખોળે બેસાડી પોતે હીંચે છે.

પ્રજાસત્તાક દિને રાષ્ટ્રધ્વજને સલામી અપાવે છે
એને માફ કરજે તું
કેમ કે હરખનો માર્યો એ ભૂલી ગયો છે
પ્રજાસત્તાકનો સાચો મતલબ.

તું છુકછુક ગાડીનું એન્જિન બને છે ક્યારેક
તો
સકલ સૃષ્ટિ તારા ફરાકનો છેડો ઝાલી
ડબ્બો બની જોડાય છે.
ડબ્બાની બારીમાંથી ડોકું કાઢી હું જોઈ રહું છું
તું દેખાડે છે તેવી
અજાણી અચરજ ભરી જગાઓને પસાર થતી…

એક દિવસ ઉતરી જઈશ હું ડબ્બામાંથી
કોઈ અજાણ્યા સ્થળે..
કોઈ નહીં હોય મારું
કે
નહીં કોઈનોયે હું…
નહીં હોય મારી પાસે ભાષા
માત્ર હું અને કોઈ અબુધ દેવ

ત્યારે મારી વહારે ચડશે તારો પદરવ…
નિત્ય નૂતન રાસ..
હું સમજાવી શકીશ દેવને
ફરી પરત આવવા માટે.

(આ કવિતા ઋજુ ભટ્ટ અને ઝમકુ દવે માટે)

~ સમીર ભટ્ટ

બાળકની પોતાની ભાષા હોય અને એના જેવી મીઠાશ કશામાં ન મળે પણ કવિએ આગળ વધીને દીકરીના પદરવથી પોતીકા શબ્દકોશ રચાવાની વાત કરીને એ પદરવના લયની સુગંધ કાવ્યમાં વેરી દીધી.   

બાળક પોતાનામાં જ મસ્ત હોય, એને નવું ફ્રૉક પહેરાવો કે નવી જગ્યાએ લઈ જાવ! એ જુએ બધું, માણે પણ બધું પણ એનો સ્વ-ભાવ સલામત જ રહે. ‘બહાર જીવતાં’ તો એ મોટું થાય પછી શીખે. આ બાળ-જીવન-સત્ય કવિએ કાવ્યમાં કેવું સરસ પરોવી દીધું છે! વળી એ તો ઈશ્વરનું રૂપ છે. નિત્ય-નૂતન રાસ એનો જ હોય.

પ્રજાસત્તાક દિવસની અને પ્રજાસત્તાક શબ્દના અર્થની કવિતામાં વાત કરતાં કરતાં કવિ ક્યાં પહોંચી ગયા છે….. દીકરીના ફરાકનો છેડો ઝાલી સકળ સૃષ્ટિના પ્રવાસે !! આ છુકછુક ગાડીના ડબ્બામાંથી તો સૌ કોઈએ એક દિવસ ઉતરવાનું જ છે પણ એવે પેલો મધુર પગરવ હાથ ઝાલશે એ કલ્પન અદભૂત!    

એક નાનકડી દીકરી પોતાની બાળક્રીડાથી પિતાના હરખને માત્ર અનેકગણો જ નથી કરતી, પગના ઠમકારે બ્રહ્માંડનું દર્શન પણ કરાવે છે, કનૈયાના મુખમાં જશોદાએ કરેલું એમ.
***
પ્રિય લતાબહેન, ‘કાવ્યવિશ્વ’નું તમારું સ્વપ્ન સાકાર થયું છે તેનો આનંદ. તેનું વૈવિધ્યપૂર્ણ સ્વરૂપ ઊંચી આશા જગવે છે. આ કાવ્યવિશ્વ વિશ્વકાવ્યનો વિસ્તાર સાધે તેવી શુભકામનાઓ. તેનું ફલક સદા સંવર્ધિત થતું રહે તેવી અભિલાષા સાથે અભિનંદન.- વિનોદ જોશી
***

🌹દિનવિશેષ 2 ઓગસ્ટ🌹

હું ને કથા ~ રઘુવીર ચૌધરી