🔆સાજ મેવાડા ~ આવી બેઠો🔆 -

*વૃધ્ધની વેદના*

આવી બેઠો અટારીમાં, ઘર એનું વિશાળ છે,
એકલો ને અટૂલો એ વૃધ્ધ આજે ઉદાસ છે.
ગયાં સૌ બાળકો એનાં જઈ વસ્યાં વિદેશમાં,
કોઈ નથી એની સાથે બેઠો એમ વિચારમાં.

પૌત્ર પૌત્રી કદી તો આવશે, ગળે લગાડશે,
જોયા કરે પડોશીના બાળ હસી હસી રમે.
આજે કુટુંબમાં ભૂલકાં મસ્તી કરતાં નથી,
કેવું વિરાન એ આંગણું જેને બાળકો નથી!

લાવી છે નોકરાણી દીકરાને આજ સાથમાં,
આખરે રડતો મૂકે, રહે ના ધ્યાન કામમાં.
નાનું બાળક કાલી કાલી ભાષા બોલતાં રડે
દાદા દાદા કહેતો એ વૃધ્ધને વળગી પડે.

બાળને અંકમાં લીધો વૃધ્ધે અપાર હેતથી
વ્હાલ કરી ગયો પૌત્ર એમનો એ ભલે નથી.

~ ‘સાજ‘ મેવાડા

આજના સમયની વેદના. સમૃદ્ધિમાં જીવતા સમાજની સચ્ચાઈ.

ચારેબાજુ એવા અનેક ઘરો જોવા મળશે. મોટા મોટા બંગલા પણ અંદર રહેનારા માત્ર દાદા-દાદી! પુત્ર પૈસા મોકલી ઇતિશ્રી સમજી લે. મળવા આવવાનો સમય નથી. મા-બાપની કાળજી લેવાનો તો સવાલ જ નથી. જરૂર હોય તો પગારદાર માણસ ગોઠવી દીધા અને ફરજ સંપૂર્ણ. પણ આ વર્તમાન છે અને એના સાથે જીવવું રહ્યું.

🙏🏻 ‘કાવ્યવિશ્વ’ની મુલાકાત લેવા બદલ આભાર. પ્રતિભાવ લખશો તો ગમશે. આપ આ સાઇટ subscribe કરો એવી અપેક્ષા.

***
અત્યંત સુઘડ, જીવને ઠારતું, સદ્ય પરિનિવૃત્તિ સાધી આપતું, શાંતિ અને શાતા દાયક, ઊંચી ગુણવત્તાવાળું સાહિત્યિક તથા સર્જનાત્મક સાહિત્ય માણવાનું આવું વિરલ પ્લેટફોર્મ આપવા બદલ આપનો આભાર. અભિનંદન અને શુભેચ્છાઓ ~ જયેન્દ્ર શેખડીવાળા

‘કાવ્યવિશ્વ’ વિશે વિદ્વાનોના પ્રતિભાવો
***