🔆વિનોદ જોશી ~ એ પળ🔆

એ પળ હજી ન ભાળી,
હોઈ શકે એ મેઘધનુષી, હોઈ શકે છે કાળી!

વરસોથી બેઠું પગ વાળી વાદળમાં ચોમાસું,
ઊભી ધાર ન ફાવે એને હોય વરસવું ત્રાંસું;
ખરબચડી આખી આવરદા ખોટુકલી પંપાળી!

ઘાસ રાતભર ખમે હવાના હણહણતા હડદોલા,
પછી સવારે ગણે ઝીણકા ઝાકળના ફરફોલા;
ટહુકા જેવું રોજ કશું ચુપચાપ વીણતો માળી!

~ વિનોદ જોશી (13.8.1955)

માત્ર વર્તમાનની ક્ષણ આંખ સામે રહે છે, રહી શકે છે. ભૂતકાળ વીતી ગયો છે અને ભવિષ્ય વર્તમાન બનીને જ આવશે. હા, એની કલ્પના કરી શકાય પણ તૈયારી રાખવી પડે, એ રૂપાળી કે કાળી પણ હોય શકે.

માનવ સ્વભાવ છે ભવિષ્યનાં સપનાં જુએ. સપનાં રંગીન જ હોય. સપનાં સુખનાં જ હોય. કોણ દુખનું કે પીડાનું સપનું જુએ? આ ગીતમાં આ જ માનવસ્વભાવ છે અને પૂરી સમજણ સાથેનો. નાયકની તૈયારી છે, કોઈ પણ પ્રકારના ભવિષ્યને આવકારવાનો. કદીક જીવનને ખોટું પંપાળવા બદલનો અફસોસ પણ છે.

બીજા અંતરામાં કલ્પન હ્રદયે જડાઈ જાય એવું છે. રાતભર ઘાસ હવાને હડદોલે આમતેમ થતું રહે છે અને પછી એના શરીરે ઊઠે છે ઝાકળના ફરફોલા. આ કવિની કલ્પના છે પણ મને અહીં ‘ઝીણકી ઝાકળના ફરતા પગ ફોરા’ માનવું વધારે ગમે. પછી એમાંથી વીણાતા જાય ટહૂકાઓ….

પણ મૂળ વાત આવતી અજાણી પળની છે….. રૂપાળી કે કાળી….  

🙏🏻‘કાવ્યવિશ્વ’ની મુલાકાત લેવા બદલ આભાર. પ્રતિભાવ લખશો તો ગમશે. આપ આ સાઇટ subscribe કરો એવી અપેક્ષા.  

***

‘કાવ્યવિશ્વ’ વિશે વિદ્વાનોના પ્રતિભાવો      

પ્રિય લતાબહેન, ‘કાવ્યવિશ્વ’નું તમારું સ્વપ્ન સાકાર થયું છે તેનો આનંદ. તેનું વૈવિધ્યપૂર્ણ સ્વરૂપ ઊંચી આશા જગવે છે. આ કાવ્યવિશ્વ વિશ્વકાવ્યનો વિસ્તાર સાધે તેવી શુભકામનાઓ. તેનું ફલક સદા સંવર્ધિત થતું રહે તેવી અભિલાષા સાથે અભિનંદન. ~ વિનોદ જોશી

***

ગીતનું સ્વરૂપ ~ વિનોદ જોશી

🌹દિનવિશેષ 13 ઓગસ્ટ🌹