🔆સોનલ પરીખ ~ દ્રુમોની છાયામાં🔆

*વિચારો – સોનેટ*

દ્રુમોની છાયામાં કવચિત ફરતા શૈલશિખરે
વિચારોનાં ટોળાં પવનલહરી જેમ વિહરે
પછી મારી વાણી અવનત બનીને અનુસરે
કરે યાત્રા દૈવી જલથલ વિષે ને નભ પરે

કદી થાકી જાતા સમયગતનો ભાર વહતાં
વળી ઊભા થાતા નવકમલ શી તાજપ લઈ
કદી દષ્ટાઓના વચનસમ સામર્થ્ય ધરતા
વહે કોઈ વેળા ઝરણજલ શા નીરવ બની

બધા શબ્દાર્થોથી પર, ગહન એની અકલતા
સરે ભાવોર્મિના તરલ પરપોટા, વિરમતા
ઊંડા ઊંડાણોમાં પરમ શુભ ને શાંત શમતા
ફરે બ્રહ્માંડોમાં અદ્દભુત રહસ્યો સમજતા

વિચારોની લીલા સભર મુજ હસ્તીને કરતી
બની સૂર્યો તારા મમ હૃદય-અંધાર હરતી

~ સોનલ પરીખ

સોનલ પરીખ * ‘નિશાંત’ * એન.એમ.ઠક્કરની કંપની 2003 (કાવ્યસંગ્રહમાંથી)

વિચાર/વાણી પર એક વૈચારિક કાવ્ય.

‘વિચારોના ટોળાં’, જી હાં, વિચાર એક નથી હોતો. એકસાથે અનેક વિચારોના ટોળાં જાણે ત્રાટકી પડતા હોય છે. એનો વેગ હવાની જેમ વહેતો…. આ જ વિચારો માનવીને બોલવા પ્રેરે અને આ શબ્દો કંઈ પણ કરી શકે. પોતાની વાણી માટે નાયિકાની આ વાત કયા સ્તરની છે જુઓ,

‘કરે યાત્રા દૈવી જલથલ વિષે ને નભ પરે’

વિચારો અને એને કારણે પ્રગટેલી વાણી જલથલ અને નભ પરે એક દૈવી યાત્રા કરે છે. આ યાત્રા ભૌતિક નથી, આ યાત્રા વ્યવહાર જગતની નથી. દૈવી છે. અર્થાત આ યાત્રાનું સ્તર ખૂબ ઊંચું છે. આ સરસ્વતીનું વરદાન છે! બાકી સામાન્યજન પાસેય વિચાર અને વાણી તો હોય છે, સતત મળ્યા કરતી આ બાબત બસ જ્યાં ને ત્યાં વેડફાતી રહે છે.

યાત્રા અને વિરામ આ ચક્ર છે જે હરેક માનવને લાગુ પડે છે. પછી એ વિચાર-વાણી વેડફનાર હોય કે એને વરદાન સમજી વંદના કરનાર. વાણી-શબ્દો કદીક દૈવી સામર્થ્ય લઈને આવેલા હોય કે કદીક નિર્મળ સ્વચ્છ ઝરણ સમા વહેતા હોય. આ તો એને સમજવા માટેનો પ્રયત્ન બાકી એની અકલતા કેવી ગહન! એનો પાર પામી ન શકાય. એટલે જ કહ્યું છે, ‘શબ્દ બ્રહ્મ છે.’ એ પરમ શુભ છે, અદભૂત રહસ્યો ધરાવે છે. સરસ્વતીદેવીની આ લીલા ઉપાસકના હૃદયને સભર બનાવતી ને સૂર્ય સમ ફળે છે.

સરસ્વતીના એક શુદ્ધ ઉપાસક આ સિવાય બીજું શું કહી શકે?    

🙏🏻‘કાવ્યવિશ્વ’ની મુલાકાત લેવા બદલ આભાર. પ્રતિભાવ લખશો તો ગમશે. આપ આ સાઇટ subscribe કરો એવી અપેક્ષા.

***

‘કાવ્યવિશ્વ’ વિશે વિદ્વાનોના પ્રતિભાવો

લતાબેન, કાવ્યની પસંદગી કરીએ ત્યારે કાવ્યનું સ્તર અને પસંદગી કરનારનું સ્તર બંનેની ઓળખ થતી હોય છે અને તે તમે ખૂબીથી નિભાવી રહ્યા છો. બહુ મોટું કામ થઈ રહ્યું છે. ખૂબ ખૂબ શુભેચ્છાઓ.~ રાજેશ વ્યાસ ‘મિસ્કીન’

***

🌹દિનવિશેષ 14 ઓગસ્ટ🌹

ગાંધારી