🔆હસમુખ ટાંક ~ ચાલ સમજણમાં🔆

ચાલ, સમજણમાં વિહરીએ
મારું – તારું , તારું – મારું નાંખી દઈએ દરિયે
ચાલ , સમજણમાં વિહરીએ

ભૂલોને મનમાં રાખી, કરશો તમે શું ?
એ ભલે ના મૂકે, આંટી મેલી દે ને તું
સંબંધોના સૂરજ બની, ઠેર ઠેર ઝળહળીએ
ચાલ, સમજણમાં વિહરીએ .

નાની – મોટી પીડાનો, ના રાખો શિરે ભાર;
ઘોર અંધારા પાછળ હોય સોનેરી સવાર
શ્રદ્ધાને શ્વાસમાં વણી, જીવન જીવતા જઈએ
ચાલ, સમજણમાં વિહરીએ

શું લઇને આવ્યા હતા, શું લઇ જાશું સાથે;
જીવન તો ઝળહળતું લાગે પ્રભુના પ્રતાપે
હુંપણાને ઓગાળી દઈ, સરળમાં સંચરીએ
ચાલ, સમજણમાં વિહરીએ.

~ હસમુખ ટાંક ‘સૂર’

સીધી સાદી અને કોઈપણ સમયમાં ઉપયોગી વાત.
આજે સમાજમાં એક સમજણ સિવાય બધું જ જોવા, અનુભવવા મળે છે અને આ એક બાબત એવી છે કે જે અબજો રૂપિયા હોય તોયે ખરીદી શકાય નહીં. એટલું જ નહીં, જીવનમાં ખરી સમજણ આવતાં બહુ વાર લાગે છે, કોઈકને તો એ છેલ્લું ટાણું આવે તોય નથી આવતી. એ કેળવવી પડે છે. બગીચામાં જેમ છોડને ઉગાડીએ એમ સમજણને માવજતથી ઉગાડવી પડે છે. એ  જંગલી ફૂલ નથી કે ગમે ત્યાં ઊગી જાય.  
થોડી ઉપદેશાત્મક ખરી, જે કવિતામાં ન હોય તો વધુ સારું પરંતુ પ્રયત્ન સરસ છે, ભાવ સરસ છે.
જેવી સરળ કવિતા એવી સરળતા જીવનમાં હોય તો ન્યાલ થઈ જવાય.
***
‘કાવ્યવિશ્વ’ વિશે વિદ્વાનોના પ્રતિભાવો
કવિતા ‘ટોક ઓફ ધ ટાઉન’ થઈ શકે? એક વ્યક્તિ સંસ્થા જેટલું કામ કરી શકે? ઉત્તર મેળવવા જુઓ kavyavishva.com ~ ઉદયન ઠક્કર
***
‘કાવ્યવિશ્વ’ પર આપ આવ્યા એનો આનંદ છે. પ્રતિભાવ લખશો તો આનંદ બેવડાશે.

🌹દિનવિશેષ 17 ઓગસ્ટ🌹

હું ને મારી વાર્તા