🔆ગની દહીંવાલા ~ બળેલ જીવને🔆

બળેલ જીવને બાળીને આપણે મળીએ;
જતી રહી હો દીવાળી, ને આપણે મળીએ.

ગગન સમું તો હવે ક્યાં ઉભયને કાજ રહ્યું?
બીજે જ બીજ નિહાળીને આપણે મળીએ.

બધાં જ આપણાં દર્પણ હવે સલામત ક્યાં?
કે એકમેકને ભાળીને આપણે મળીએ!

સુકામણા હવે સંબંધ જો સહી ન શકે,
તો પાંપણોને પલાળીને આપણે મળીએ.

સમયનું વસ્ત્ર ચઢયું ચાળણીને ચાળે છે,
વધેલ શ્વાસને ગાળીને આપણે મળીએ.

વિધિએ સ્વપ્ન સમો પણ વિકલ્પ રાખ્યો છે,
મિલનની ટેવને ટાળીને આપણે મળીએ.

ખમો ખમો હે વિરહરાત કેરા ભણકારા!
વળાંકે સાંજને વાળીને આપણે મળીએ.

આ પાનખરનું ‘ગની’, કોઈ તો હશે રક્ષક,
નવા જ ક્ષેત્રના માળીને આપણે મળીએ.

~ ગની દહીંવાલા (17.8.1908 – 5.3.1987)

***
‘કાવ્યવિશ્વ’ વિશે વિદ્વાનોના પ્રતિભાવો
કવિતા ‘ટોક ઓફ ધ ટાઉન’ થઈ શકે? એક વ્યક્તિ સંસ્થા જેટલું કામ કરી શકે? ઉત્તર મેળવવા જુઓ kavyavishva.com ~ ઉદયન ઠક્કર
***

‘કાવ્યવિશ્વ’ પર આપ આવ્યા એનો આનંદ છે. પ્રતિભાવ લખશો તો આનંદ બેવડાશે.

🌹દિનવિશેષ 17 ઓગસ્ટ🌹

શાળાશિક્ષણ કઈ ઉંમરે?