🔆દિનેશ ડોંગરે ~ હવે આ દીપ🔆

હવે આ દીપ ઝળહળશે, દીવામાં તેલ પૂર્યુ છે;
સતત અંધાર ઓગળશે, દીવામાં તેલ પૂર્યુ છે.

ખુલી જાશે દિશાઓ સાવ મારગ સાફ દેખાશે;
પછી મંઝિલ સહજ મળશે, દીવામાં તેલ પૂર્યુ છે.

ઉગેલો સૂર્ય પણ ચાલ્યો હવે અસ્તાચળે પાછો
ફરીથી સાંજ આ ઢળશે, દીવામાં તેલ પૂર્યુ છે.

નિરાશાઓને ખંખેરી ઊભો થઇ ચાલજે આગળ
નવી આશાઓ સળવળશે, દીવામાં તેલ પૂર્યુ છે.

તમે તો‌ માહ્યલાને ખૂબ ભારેખમ કર્યો “નાદાન”;
અહમનું મીણ પીગળશે, દીવામાં તેલ પૂર્યુ છે.

~ દિનેશ ડોંગરે ‘નાદાન’

હકારાત્મકતાનો દીવો અહીં ઝળહળે છે.

જીવનમાં નિરાશાની, હાર અનુભવવાની પળો અનેક. અને એ સૌના જીવનમાં આવે છે. સ્કેલ જુદો જુદો હોઈ શકે પણ આવવાની જરૂર. એમાં ગરીબ-તવંગર, દેશી-વિદેશી, કાળા-ગોરા, સ્ત્રી-પુરુષ કે નાના-મોટાંનો કોઈ ભેદ નથી.

આ અર્થમાં ‘દીવામાં તેલ પૂર્યું છે’ રદીફ ઘણો અસરકારક સાબિત થાય છે.

આખું ઘર અંધકારથી ભર્યું હોય ત્યારે એને હટાવવા માટે શું જોઈએ? બસ, એક દીવો પ્રગટાવો! ખરેખર અંધારા જેવું કાંઈ છે જ નહીં. અંધકારનું અસ્તિત્વ જ નથી. જે છે એ છે અજવાસનો અભાવ. જરાક અજવાળું આવ્યું કે અંધકાર ગાયબ! દુખ આવે ત્યારે પણ આ જ યાદ રાખવા જેવું. કશું જ સ્થાયી નથી સિવાય કે પરિવર્તન. માત્ર પરિવર્તન સ્થાયી ચીજ છે. એટલે જે આજે છે એ કાલે નથી રહેવાનું. આજે દિશાઓ ધૂંધળી છે તો કાલે માર્ગ સાફ દેખાશે અને મંઝીલે પણ પહોંચાશે.

અહમ ઓગળશે તો પણ દૃષ્ટિ ખુલશે અને ખોટા વિચારોના અંધારા દૂર થશે.

એક આ શેરમાં જરા સવાલ થયો.  

‘ઉગેલો સૂર્ય પણ ચાલ્યો હવે અસ્તાચળે પાછો / ફરીથી સાંજ આ ઢળશે, દીવામાં તેલ પૂર્યુ છે.’

સામાન્ય રીતે સૂર્ય આશાનું પ્રતિક છે અને સાંજ નિરાશાનું. પણ કવિને જુદું કહેવું હશે. દીવો પ્રતીક છે એટલે સાંજ ઉઘાડવી હશે….. 
***

‘કાવ્યવિશ્વ’ને આવકાર

જુદાં જુદા કાવ્યસ્વરૂપો વિષે તમે સરસ અને ઉપયોગી માહિતી આપો છો, બરાબર એ રીતે કવિઓની કવિતા અને સાથે એમના સ્વરાંકનો પણ આપો છો. તમારું સ્વપ્ન સાકાર થયાનો હરખ છે. તમને અભિનંદન. ~ સંધ્યા ભટ્ટ

***

🌹જન્મદિનવિશેષ 3 સપ્ટેમ્બર🌹 

એક દિવસ