🔆ગૌરાંગ ઠાકર ~ બોલ ને સખા🔆

બોલ ને સખા કઈ રીતે હું આયના સામે જોંઉ ?
જોઈ તું લે તો ક્યાંય બીજે હું ભાળવું મેલી દઉં.

ટેરવે લીધું કંકુ અલી મેંય બરાબર એમ
ઊંચકે જાણે આભ ધરાથી સૂરજદેવને જેમ
ભાલમાં તિલક તાણતાં લાગી હું અજાણી હોંઉ ……

ઉરનો આનંદ આજ ગળાનાં હારમાં પહેર્યો મેં
હાથનાં કંગન હાથને દે છે સુખની તાળી લે
મન કળાયેલ મોર થયું ત્યાં જાત ને આખી ખોંઉ……

આંખમાં ઝૂલે શમણું જાણે ડાળીએ ઝૂલે ફૂલ
રૂદિયે હરખ માય નહિ તો હોઠને કીધું ખુલ
કેશ હું ગૂંથુ કે પછી હું કાનમાં કુંડલ પ્રોંઉ……..

રાતના તારા આંખમાં મારી કરતાં રાતની પાળી
આવતો જ્યાં તું શમણે ત્યાં તો પાંપણ પાડતી તાળી
આવ ને મારા ભાગની નીંદર તુજને આપી દઉં….

~ ગૌરાંગ ઠાકર

દિવ્ય ભાસ્કર @ કાવ્યસેતુ 352 @ 23 ઓક્ટોબર 2018 * લતા હિરાણી

પ્રેમમાં પડેલી સ્ત્રી આયના સામે જુએ અને એને એમાં પોતાના ચહેરાને બદલે પ્રિયતમનો ચહેરો દેખાય એવું બને. એ ચાંદ, સૂરજ, તારા જોતી હોય, ખુલ્લા આકાશ તરફ જોતી હોય અને એને બધે જ એના પ્રિયતમનો ચહેરો દેખાય એવું બને જ… કેમ કે આ આખુંય વિશ્વ પ્રેમની ભાષા સમજે છે, આખુંય વિશ્વ પ્રેમનો પડઘો પાડે છે. પ્રેમના વાઇબ્રેશન્સ એવાં છે કે જે સેકન્ડ્સમાં પૃથ્વીને બીજે છેડેય પહોંચી જાય છે અને પ્રેમ એટલે પ્રેમ. એમાં મમતા, કરુણા બધુંય સમાઈ જાય.

આ ગીતમાં આમ તો બધાં જ કલ્પનો મનને પ્રેમના નશામાં ચૂર કરે એવાં છે પણ મને સૌથી વધુ ગમ્યું એ – ટેરવે કંકુ લેવાના હરખને કવિએ સૂર્યોદય સાથે સરખાવ્યું ! જાણે ધરાની આંગળી કંકુ જેવા લાલ સૂરજને લઈને ભાલ તરફ જાય છે ! વાહ, મન સોળે કળાએ ખીલી ઊઠે એવી રમ્ય કલ્પના છે !

કવિ વાત કરે છે શૃંગારરત નાયિકાની. નાયિકાને શૃંગાર કરવો છે ને ક્ષણે ક્ષણે, પ્રત્યેક ક્રિયામાં એને પ્રિયતમનો પ્યાર, સનમનાં સપનાં, દિલદારની દુનિયા અનુભવાય છે. એ પોતે એનાથી જ વીંટળાયેલી છે. એને રહેવું છે એમાં, જીવવું છે એમાં. સખાની એક નજરના બદલામાં એ બધું જ છોડી દેવા તૈયાર છે… અને મજા એમાં છે કે સખાની યે એ જ મરજી હોય કે ‘છોડ દૂં, સારી દુનિયા તુમ્હારે લિયે….’ આપણે જાણીએ છીએ કે અમુક હદ સુધી એ મુનાસિબ પણ હોય છે…. જિંદગીમાં એકવાર તો એવો સમય આવવો જોઈએ કે જ્યારે પ્યારથી વધુ જરૂરી બીજું કોઈ કામ ન હોય !! પ્રેમમાં હજુ ગળાડૂબ છે એ લોકો અને એ અદભૂત દુનિયાની સુગંધ લઈને વાસ્તવની દુનિયામાં જીવતા લોકો, આ વાત સાથે સહમત થશે.

‘કાવ્યવિશ્વ’ને આવકાર

જુદાં જુદા કાવ્યસ્વરૂપો વિષે તમે સરસ અને ઉપયોગી માહિતી આપો છો, બરાબર એ રીતે કવિઓની કવિતા અને સાથે એમના સ્વરાંકનો પણ આપો છો. તમારું સ્વપ્ન સાકાર થયાનો હરખ છે. તમને અભિનંદન. ~ સંધ્યા ભટ્ટ

🌹જન્મદિનવિશેષ 3 સપ્ટેમ્બર🌹 

એક દિવસ