🔆જલન માતરી ~ સમજદારીથી અળગા🔆

સમજદારીથી અળગા થઈ જવાનાં સૌ બહાનાં છે,
મને શંકા પડે છે કે દીવાના શું દીવાના છે?

ખુદા! અસ્તિત્વને સંભાળજે કે લોક દુનિયાના,
કયામતમાં એ તારી રૂબરૂ ભેગા થવાના છે.

ગમે ના સૌ કવન તો માફ કરજો એક બાબત પર,
ખુદા જેવા ખુદાનાં ક્યાં બધાં સર્જન મજાનાં છે?

સજા દેતો નથી એ પાપીઓને એટલા માટે,
મરીને આ જગતમાંથી એ બીજે ક્યાં જવાના છે?

ચલો એ રીતે તો કચરો થશે ઓછો આ ધરતીનો,
સુણ્યું છે ધનપતિઓ ચંદ્ર પર રહેવા જવાના છે!

તમે પણ દુશ્મનો ચાલો આ મારા સ્નેહીઓ સાથે,
એ કબ્રસ્તાનથી આગળ મને ક્યાં લઈ જવાના છે?

રહે છે આમ તો શયતાનના કબજા મહીં તો પણ,
‘જલન’ને પૂછશો તો કે’શે એ બંદા ખુદાના છે.

~ જલન માતરી (1.9.1934 – 25.1.2018)

***

‘કાવ્યવિશ્વ’ને આવકાર

‘કાવ્યવિશ્વ’નો નકશો વિશાળ છે અને સંભાવનાઓ અનેક છે. તમે અંતરના ઉમળકાથી આ શરૂ કર્યું છે અને હજી ખૂબ ખીલવશો તેવી આશા છે. ~ મનસુખ સલ્લા

🌹જન્મદિનવિશેષ 1 સપ્ટેમ્બર🌹 

એક દિવસ