🔆રેખા જોષી ~ કામો બધા પૂરા કરી🔆

બા
કામો બધા પૂરા કરી, બા એકલી બેઠી હતી
માંગી કશી ના ચાકરી, બા એકલી બેઠી હતી

મમતાભરી સમતા હતી, ઘરને સમેટી ચાલતી
દેતી પરીક્ષા આકરી, બા એકલી બેઠી હતી

ઝોળી સમો ઝુલાવતો, ખૂણે પડેલો ખાટલો
જાણે નકામી કાંકરી, બા એકલી બેઠી હતી

માફક ન આવી એટલે, રસ્તો બતાવીને પછી
ફેંકી જ દીધી ઘા કરી, બા એકલી બેઠી હતી

ફફડે નહીં ફરકે ધજા, ત્યારે અહીં ઈશ્વર મળે
સાચી જ સેવા ના કરી, બા એકલી બેઠી હતી

~ રેખા જોષી

વર્તમાન સમયમાં જાણીતી વાત. કદાચ ભૂતકાળમાં પણ ક્યાંક આવું બનતું જ હશે તોય.

‘બા એકલી બેઠી હતી’ રદ્દીફ સ્પર્શી જાય એવો છે તો ‘જાણે નકામી કાંકરી, બા એકલી બેઠી હતી’ અહીંયા નકામી કાંકરીનું કલ્પન સીધું હૈયે વાગી જાય છે.

‘કાવ્યવિશ્વ’ને આવકાર

તમારા શબ્દો “કાવ્યની કેડી ક્યાંક મારા આગલા જન્મથી કોતરાયેલી હશે, નહીંતર આગળ પાછળ ક્યાંય કાવ્ય તો શું, સાહિત્ય સાથેય નિસબત ન હોય એવા વાતાવરણમાં જન્મ્યા અને જીવ્યા હોઈએ એવામાં કાવ્યને ઝંખ્યા કરવું એ અંદર ઊંડે દટાયેલાં બીજ હશે, સમય આવતાં જેનાં અંકૂર ફૂટી નીકળ્યા.” આ વાત મને પણ લાગુ પડતી હોઈ સ્પર્શી ગઈ. ફરીથી ખૂબ ખૂબ અભિનંદન. ~ દેવિકા રાહુલ ધ્રુવ

🌹જન્મદિનવિશેષ 9 સપ્ટેમ્બર🌹 

વહાલા દાદીમા