🔆કવિ રાવલ ~ ઝાડ કરતું નથી🔆

ઝાડ કરતું નથી પ્રયુક્તિ
ડાળ, ફૂટી હશે અમસ્તી

એક કલ્પન, નશો ને મસ્તી
થાય ઝળહળ જરાક હસ્તી

ચેતનાની ખરી અસર છે
આ નશો ને નશાપરસ્તી

કોણ છે તું કબીર જેવો ?
પૂછ્યું મેં, તો કહે: “વિરક્તિ”

જેમ મસ્તી બને અનુભવ
તેમ અનુભવ થયો છે મસ્તી

~ કવિ રાવલ

લોકો કહે છે, ‘ખાલી હાથે આવ્યા અને ખાલી હાથે જવાના.’

ભૌતિક રીતે આપણે ખાલી હાથે આવ્યા અને એમ જવાના એ સાચું. બાકી ભરેલા આવ્યા છીએ અને ભરેલા જવાના છીએ. ભીતરમાં જે ભાવો ભર્યા હશે એ આત્માના સંસ્કાર બનીને સાથે આવવાના અને આગલા જનમમાં ધીમે ધીમે પ્રગટવાના. એના માટે કોઈ આયાસ પણ નથી કરવો પડતો. હા, એ કેળવાતા રહે છે. વિકસતા રહે છે, પોઝીટીવ હોય કે નેગેટીવ. આ યાત્રા જનમોજનમ ચાલતી રહેવાની.  

આમ જ ઝાડમાં કોઈ પ્રયુક્તિ વગર ડાળ ફૂટી નીકળે છે. કોઈ વાત દિમાગ પર સવાર થઈ જાય તો એનો નશો કે ઝળહળ મસ્તી પણ ફૂટી નીકળે છે. કહે છે ને કે પ્રાણ અને પ્રકૃતિ સાથે જાય. આપણી ચારેબાજુ એના ઉદાહરણ દેખાશે. આપણે પોતે પણ આપણને નિહાળીએ તો આ સત્ય સમજાશે. અલબત્ત માનવની ચેતના જાગે તો કંઈ પણ શક્ય છે એ વાત જુદી. પણ આ એટલું સહેલું નથી.

આ કવયિત્રી ખૂબ સરસ લખે છે પણ મને લાગે છે કે એ ખૂણે બેસીને કામ કરવામાં માને છે. એને ઝળહળ થવામાં કે થતા રહેવામાં રસ નથી. એટલે જ એના કામમાં પણ ઊંડાણ વરતાય છે.  

‘કાવ્યવિશ્વ’ને આવકાર
સાતત્ય સાથે ચાલી રહેલું સુંદર કામ. ‘કાવ્યવિશ્વ’ એટલે કાવ્યસાહિત્યનો જયજયકાર… વાહ લતાબહેન.. ~ રક્ષા શુક્લ

🌹જન્મદિનવિશેષ 16 સપ્ટેમ્બર🌹 

પ્રિય શિક્ષકોને