🔆કુણાલ શાહ~ રાત થીજીને🔆   

રાત થીજીને સડક થઈ જાય છે,
બલ્બમાંથી ચાંદની રેલાય છે.

થાકની બે કોથળી પીધા પછી,
રોજ પડછાયા લથડીયા ખાય છે.

તારલા ફૂટપાથ પર આડા પડ્યા,
વાહનોના હોર્ન લોરી ગાય છે.

ગોદડીથી પણ નરમ આકાશ છે,
ખપ પડે ને ફટ કરી ઓઢાય છે.

શું અકસ્માતે ચમત્કારો કર્યાં!
કંઈક બેઘર સ્વર્ગવાસી થાય છે.

~ કુણાલ શાહ    

પ્રથમ શેરથી માંડીને આખરી સુધી, દરેક કલ્પનોની પ્રખરતા જુઓ !

કલ્પનામાં નાવીન્ય તો છે જ, અનોખાપણું છે જ પરંતુ નોંધપાત્ર વાત કે દરેક શેર દમદાર, દરેક શેર ચુસ્ત.

દરેક શેર ટંકારવ કરતો એક જબરદસ્ત કલ્પન લઈને આવે છે, દિમાગ અને દિલની આરપાર નીકળી જતો.
વાહ વાહ કવિ !   

‘કાવ્યવિશ્વ’ને આવકાર

કેટલાક જૂનાં તો કેટલાક નવા કાવ્યો, બધાની ગૂંથણી એવી સરસ કરી છે જેમ અંબોડે મોગરાની વેણી. આપની મહેનતે આ બગીચો મઘમઘી રહ્યો છે. એની સુવાસ ચારેકોર પ્રસરી રહી છે. ~ ગીતા પંચાલ 

🌹જન્મદિનવિશેષ 29 સપ્ટેમ્બર🌹