🔆કિરીટ ગોસ્વામી ~ આ બાજુ🔆

આ બાજુ છે એબીસીડી, આ બાજુ છે કક્કો…
વચ્ચે બેઠો મૂંઝાતો, આ નાનકડો એક ચક્કો!

ચક્કાભાઈનું મન તો જાણે પતંગિયું રૂપાળું…
નાનું-નાનું, રંગબેરંગી, સુંવાળું-સુંવાળું…
હમણાં ઊડું, હમણાં ઊડું, એવું એને થાય.……
ઊડવાની બસ વાત માત્રથી એ તો બહુ હરખાય…
ત્યાં જ ચોપડા ખડકી, પપ્પા કરતા, હક્કો-બક્કો!
તેથી બેઠો મૂંઝાતો, આ નાનકડો એક ચક્કો!

ચોપડીઓની સાથે પાછી આવી ઢગલો નોટ…
પતંગિયું મટીને થાશે, મન એનું રોબોટ…
હોમવર્કનો કાંટો, એની પાંખોમાં ભોંકાય…
પપ્પા કાઢે આંખો, તેથી કશુંય ક્યાં બોલાય?
‘ચોપડીઓ સારી કે ઊડવું?’ ખંજવાળે એ ટક્કો!
મનમાં-મનમાં, ખૂબ મૂંઝાતો, નાનકડો આ ચક્કો!

~ કિરીટ ગોસ્વામી

કેવું મજાનું બાળગીત ! આજના બાળકની સ્થિતિનો ચિતાર…. હાસ્યમાં પરોવીને

‘કાવ્યવિશ્વ’ને આવકાર

લતાબેન, હૃદયપૂર્વક અભિનંદન, ખૂબ સરસ અને અદભૂત રચનાઓ ‘કાવ્યવિશ્વ’ થકી નિયમિત માણવા મળે છે. ~ રેખા ભટ્ટ

🌹દિનવિશેષ  2 ઓક્ટોબર🌹