🔆મકરંદ મૂસળે ~ આજે થયું🔆

આજે થયું;
લાવ, દાદાજીના રૂમની સફાઈ કરી નાખું.
સમયસર!
સમયસર કામ ન કરવાનું મ્હેણું
આજે તો ભાંગવું જ છે.

શરૂઆત પલંગની ચાદર બદલવાથી કરું તો કેવું?
એમ કરું નવી જ પાથરી દઉં!
એકદમ ફ્રેશ.
આ એ જ પલંગ છે જેમાં કેટલાંય રાજકુમારો
સફેદ ઘોડા પર સવાર થઈને આવેલા
અને રાજકુમારીઓને પરણીને લઈ ગયેલા.

પલંગની સામે જ દાદાજીનું કબાટ…
એમના મન જેવું જ ખુલ્લું
તાળું બગડી ગયેલું ને!
તેલનું ટીપું નાખીશ એટલે
તાળું ખૂલશે.
ને પછી વ્યવસ્થિત ખોલ-બંધ કરી શકાશે કબાટ.

તેલ નાખવાનું મન બનાવ્યું જ છે, તો પછી
હીંચકામાં પણ…
એના કડાંનો કર્કશ કીચૂડાટ
દાદાજીના બહેરા કાન સુધી પહોંચી શકેલો નહીં
એટલે નાખવાનું રહી ગયેલું.
આજે એ કામ પણ પતાવી જ દઉં.

હા હા, આજે જ.
સાંજ સુધીમાં.
સમયસર.
દાદાજીનું તેરમું છે ને આજે
આવતી કાલથી હું શિફ્ટ થવાનો છું
દાદાજીના આ રૂમમાં.

~ મકરંદ મુસળે

શ્રાદ્ધપક્ષમાં દાદાજી અંગે આ વાત. અહીં દીકરાને પોતાનો અલગ રૂમ મળવાનો છે એની ખુશી છે. પણ શ્રાદ્ધના દિવસો વડીલોને સંભારવાના દિવસો છે.

સ્વજન, સંબંધીજન, પડોશીજન દરેકને આ લાગુ પડે છે. તેઓ જતા રહે છે પછી એમને યાદ કરીને મોટેભાગે અફસોસ કરવાનો રહે છે. એમની હયાતીમાં જે કરવું જોઈએ એ નથી થયું હોતું. તેઓ ઘણે અંશે ઉવેખાયા હોય છે.

બિલકુલ અંગત સ્વજનો સાથે પણ આવું થાય છે. એમની મર્યાદાઓ દેખાયા કરે છે. (હવે મર્યાદા તો કોનામાં નથી હોતી?) અને સારી બાજુ જોવાનું ચૂકી જવાય છે. એક દિવસ તેઓ જતા રહે છે અને આપણી પાસે બચે છે માત્ર અફસોસ. પછી એમની સારી બાબતો બધી જ યાદ આવે છે ને આંખોમાં છલકાય છે. કાશ, એમની હયાતીમાં આટલું થઈ શક્યું હોત તો!  જીવતાં કદર ના કરી, મર્યા પછી તાજમહાલ બંધાવ્યો તોય શું?  

ભરૂચની ‘એમીટી સ્કૂલ’ના શ્રી રણછોડભાઇ શાહે એકવાર મને વાતવાતમાં કહેલું કે “બેસણામાં તો જવું જ પડશે, એના કરતાં બેસવા જઈએ.” બધાની સાથે ક્યારેક ને ક્યારેક એવું બનતું હોય છે કે કોઈ સ્વજન કે પાડોશી આપણને મળવા આવવાનો આગ્રહ કર્યા રાખતા હોય અને આપણે ‘કાલે જઈશ’ એમ વિચાર્યા રાખીએ. આ ‘કાલ’ને આવતાં વાર લાગી જાય અને એક દિવસ સમાચાર મળે કે પેલા કાકા તો ગયા! હવે રહ્યું, બેસણામાં જવાનું. અને એના માટે તો ટાઈમ નીકળવાનો જ.      

જે આપણાં છે એમને માટે ‘આજ’ રાખીએ. ‘કાલ’ તો આવતી જ રહેશે.

‘કાવ્યવિશ્વ’ને આવકાર

ખૂબ આભાર લતાબેન કે ‘કાવ્યવિશ્વ’ સમક્ષ મને દોરી લાવ્યાં. ‘કાવ્યવિશ્વ’નું સ્વરૂપ એટલું સ્પષ્ટ અને સહજ છે કે વાંચતાં જ મનમાં સમાઈ ગયું. જે બાર વિભાગો તમે નિયત કર્યા છે તે પણ કાબિલેદાદ છે. નિયમિત મુલાકાત લેવી ગમે એવું સુંદર ‘કાવ્યવિશ્વ’ ~ સરલા સુતરિયા

આપ પણ ‘કાવ્યવિશ્વ’ માટે આપનો પ્રતિભાવ મોકલી શકો છો.

🌹દિનવિશેષ 4 ઓક્ટોબર🌹

ઉલ્લાલા