🔆લતા હિરાણી ~ હોડીને આદત છે🔆 -

🥀🥀

*અરે ઓ મન…*

હોડીને આદત છે ખાબકી પડવાની દેખાડે કોણ એને દાણા ?
પંડયે હલેસાં છે બે-ચાર માંડ ને ફાટેલા સઢમાંયે કાણાં
દરિયા તું મોટો છે, માફ કરી દેજે આ હોડીના અમથા ઉછાળા…

કહેતાં તો કહી દીધું ચડી જઈશ ટોચે, પણ તળિયામાં તાકતના વાંધા
બે-ચાર, દસ-બાર કૂદકે જડે ક્યાંથી, ઉપરના આકાશી સાંધા ?
સંભાળજે પ્હાડથી, ખીજવાતા દડવે ના, તારા આ વહેણમાં પા’ણા..

તડકામાં હળવેથી પાંદડા સુકવતી એ, લે’રખીને કોણ જઇ કે’શે ?
ઘેઘૂરાં ભરચક અડીખમ ઝાડવાં તો ડાળું વંટોળીયાને દેશે !
હરખે ઉભરા ‘મા ને છલકા ‘મા બેસ, હવે સાચવને તું તારા માળા…

આમતેમ જાવું ના ક્યાંય તારે દોડી, છે રેતી ને છીપલાંની સંગત
મોતી ચળકંતા-ની માયા ને છાયામાં, છોડવી ના પોતાની પંગત
ધોધમાર તેજમાં ઝાંખું દેખાય, હશે ! માફ થાય આંખ્યુંના ઝાળાં…

~ લતા હિરાણી

પ્રકાશિત છાલક > એપ્રિલ 2021

પોતાની શક્તિ કે મર્યાદા અંગે વિચાર્યા વગર કૂદી પડતા લોકો હોય છે. પછી એ પસ્તાય છે.
પણ ‘અબ પછતાયે હોત ક્યા, જબ ચિડિયા ચુગ ગઈ ખેત !’ આવો અનુભવ ક્યારેક તમને થયો છે ખરો ?