🔆શિલ્પીન થાનકી ~ એકલો ચાલું🔆

એકલો ચાલું, સહારો ના ખપે;
માર્ગ છો ભૂલું, સિતારો ના ખપે.

પાનખરને આવકારું હર્ષથી,
કાયમી કેવળ બહારો ના ખપે.

વેગળી મંજિલ રહે મંજૂર છે,
રાહમાં એકે ઉતારો ના ખપે.

સાગરે ડૂબું ભલે મઝધારમાં-
સાવ પાસે હો કિનારો, ના ખપે.

~ શિલ્પિન થાનકી

ખુમારીની ગઝલ. જે મુસીબત આવશે, વેઠીશ પણ સહારો ના જોઈએ.

અલબત્ત મદદ લેવી ખરાબ બાબત નથી. સંજોગો પ્રમાણે નિર્ણય હોય પરંતુ અહીં બીજો શેર આજના સમયમાં ઘણો અર્થપૂરાં લાગે છે. ખાસ કરીને આજકાલના મા-બાપો માટે.

પાનખરને આવકારું હર્ષથી, કાયમી કેવળ બહારો ના ખપે.

આજે બાળકોનો જે રીતે ઉછેર થાય છે એ બહુ ચિંતાજનક છે. બે કે મોટેભાગે એક જ સંતાન હોય. એની બધી ઈચ્છા પૂરી કરવા મા-બાપ મંડ્યા રહે. ક્યારેક ગજા ઉપરવટ જઈને પણ. પોતાની અધૂરી ઈચ્છાઓ બાળક પર થોપ્યા કરે.

પરિણામ અનેકવાર આપણે જોઈએ છીએ. સંતાન કોઈ મુશ્કેલી ખમી જ નથી શકતું. જરા નિષ્ફળતા આવી કે હારી જાય છે. ‘માબાપની અપેક્ષાઓ પોતે પૂરી નહીં કરી શકે’ એ વિચારે કે પછી ‘આના વગર તો મારે નહીં જ ચાલે’ એ વિચારે આત્મહત્યા સુધી જાય છે! માતા-પિતાએ શીખવવાની જરૂર છે કે જીવનમાં બધે જ સફળતા આવે એ શક્ય નથી. નિષ્ફળતા આવે તો પણ ટકી રહેવું અગત્યનું છે.

‘કાવ્યવિશ્વ’ને આવકાર

ખૂબ સરસ. વાંચવાનો આનંદ લઉં છું. વિવિધતાવાળા કાવ્યો એટલે વળી ઓર મજા આવે. ~ દિપ્તી વછરાજાની

આપ પણ ‘કાવ્યવિશ્વ’ માટે આપનો પ્રતિભાવ મોકલી શકો છો.  

🌹દિનવિશેષ 15 ઓકટોબર🌹