🔆અશોક ચાવડા ~ સફર છે એક🔆  

સફર છે એક પણ સાથે કિનારા થૈ નથી શકતા;
મને સમજી શકે છે જે એ મારા થૈ નથી શકતા.

હે વ્યાકુળ મન હવે તું ત્યાગ પૂજાપાઠની માયા,
લખાયેલી લકીરે જો સુધારા થૈ નથી શકતા.

અહીંથી ત્યાં જવામાં શ્વાસ પણ અવરોધ લાગે છે,
ધરાના જીવતેજીવત સિતારા થૈ નથી શકતા.

જગતના લોક સાથે આટલું અંતર તો રે’વાનું,
હું બગડી ના શકું ને એય સારા થૈ નથી શકતા.

હવે સમજાવવું કેવી રીતે ભાષા વગરનો છું,
ઉપરથી બંધ આંખોથી ઇશારા થૈ નથી શકતા.

~ અશોક ચાવડા ‘બેદિલ’

‘થૈ નથી શકતા’ સાથે આવેલી એક નિશ્વાસની ગઝલ. એક ઊંડા નિસાસાની ગઝલ.

‘સફર છે એક પણ સાથે કિનારા થૈ નથી શકતા / મને સમજી શકે છે જે એ મારા થૈ નથી શકતા’

પ્રથમ દૃષ્ટિએ પ્રથમ શેરની પ્રથમ પંક્તિ પતિ-પત્ની સંબંધિત લાગે. જીવનની સફર એક છે પણ સાથે નથી રહી શકાતું. કારણ એકબીજાને સમજી નથી શકાતું! અને જે સમજે છે એ પોતાનાં નથી થૈ શકતા!!! બંને પોતપોતાની દુનિયામાં વહ્યા કરે છે. બાજુમાં છે, નજીક છે પણ એક નથી! આવી મજબૂરીવાળા દંપત્તિને સંસારમાંથી બાદ કરીએ તો કદાચ આંગળીના વેઢે ગણી શકાય એટલાં માંડ બચે! આ જ છે સંબંધોની, માનવીની માનવી સાથે જીવવાની અસફળતા. ચંદ્ર પર પહોંચી શકાય છે, મંગળ પર શોધ કરી શકાય છે, લાખો જોજન દૂર આવેલા ગ્રહો તારાઓ વિષે જાણી શકાય છે પણ નજીકના સંબંધે જોડાયેલા માણસ સાથે સુખેથી જીવવાની ચાવી એની પાસે નથી……  

બસ પછી તો દરેક શેર એક નિસાસાને લઈને જ આગળ વધતા જાય છે. હાથની લકીરોમાં બદલાવ ન જ થૈ શકવાનો હોય તો પૂજાપાઠ શા કામના? જીવતેજીવ મન ખુશીથી ચમકે એ શક્ય જ નથી લાગતું.

‘હું બગડી ના શકું ને એય સારા થૈ નથી શકતા.’  

અહીં નાયક સારા-ખરાબના વિભાગ પાડે છે. એની સાથે બીજું સત્ય એય છે કે કોઈ માણસ માટે આ જન્મમાં પોતાને એટલે કે પોતાનાં સ્વભાવને બદલવાનું જ અત્યંત અઘરું છે, લગભગ અશક્ય જેવું, સિવાય કે કોઈ મોટી ઘટના બને અને અંદર સુધી ખળભળાવી નાખે…. એટલે જ કહ્યું છે ને કે ‘પ્રાણ ને પ્રકૃતિ સાથે જાય.’ ત્યારે કોઈના માટે બીજાને બદલવાનું તો અસંભવ ! છતાં વાસ્તવિકતા એ છે કે મોટાભાગના માણસો બીજાને બદલવામાં એટલે કે બીજાને સુધારવામાં જ મોટાભાગનું જીવન ખર્ચી નાખતા હોય છે! આ એક વિડંબના છે!

🌹દિનવિશેષ 19 ઓકટોબર🌹