🔆ચંદ્રા તળાવિયા ~ પ્રેમના મારગમાં🔆

પ્રેમના મારગમાં રાહ તારી જોઈને
થાકી ગયું છે દિલ આ ………..
તને કોણ કરે પ્રેમ હવે.. જા…

એકલામાં મારી તું હાજરીને ઝંખે
ને હાજરીમાં પાળે એકાંત
લોકોથી જાણ્યું કે ઘણીવાર તું
મારી યાદમાં કરે છે કલ્પાંત
મનથી તો ફૂલોની ઝંખના કરે ને
તોય પકડે છે કાંટો તું કાં? ……..
તને કોણ કરે પ્રેમ હવે… જા…

પહેલા તો ચોરીથી સામું જુએ
ને પછી શરમુંના ખોડી દે સ્તંભ
આંખોના ચમકારા પલકોથી ઢાંકીને
ડાહ્યા થવાનો કરે દંભ
આંખે તો ઠીક રગે રગમાં ‘હ-કાર’,
તોય પૂછું તો કહે;”ના રે ના” ….
તને કોણ કરે પ્રેમ હવે… જા…

~ ચંદ્રા તળાવીયા

દિવ્ય ભાસ્કર @ કાવ્યસેતુ 367 @ 12 ફેબ્રુઆરી 2019 * લતા હિરાણી

આજના સમયનો હોટ ફેવરીટ ડાયલોગ – ‘I love u’ કે પછી થોડો સાહિત્યિક સંવાદ – ‘હું તને પ્રેમ કરું છું’ – આ બંનેમાંથી કોઈપણ બોલો ને, આ વાત પાસે સાવ ફિક્કું જ લાગે જ્યારે કોઈ એમ કહે ‘તને કોણ કરે પ્રેમ હવે…જા…’ ! આમ કહેનાર પોતે જ એને પ્રેમ કરે છે. પ્રેમ છે, છે અને છે જ. વચ્ચેનો ‘કોણ’ શબ્દ અર્થ વગરનો છે કેમ કે બીજું કોઈ વચ્ચે આવીને તો જુએ ! વેલેન્ટાઇન સ્પેશ્યલ બની જાય એવો આ ફ્રેઝ ! તમારો પ્રેમી આમાં વર્ણવેલ છે એવો/એવી ન હોય તોય વાપરી જુઓ ! અને પછી જોજો એનો જાદુ ! એક નવી કવયિત્રી પાસેથી આ મદમસ્ત ગીત મળી આવ્યું ને મોજ પડી ગઈ… સાચ્ચે જ….

સામાન્ય રીતે છોકરીઓ શરમાળ હોય ને છોકરાઓ બિન્દાસ્ત ! (અલબત્ત નવી જનરેશનમાં આ સ્થિતિ ઘણી બદલાઈ ગઈ છે એ સ્વીકારવું પડે અને જૂની પેઢીમાં અપવાદો હતા એનીય ના નહીં) આ તો જનરલ વાત થઈ પણ છોકરાને છેડવો પડે (‘છેડતી’ ના સમજતા) એ જરા મજા આવી જાય એ વાત પાક્કી. છોકરી ‘હવે જા….’ કહી દે અને પેલાએ દોડીને આવવું પડે એ નક્કી. આમાં કોઇની પાછળ પાડવાની વાત નથી. એમાં કોઈ શંકા નથી કે છોકરો છોકરીને પ્રેમ કરે જ છે. બિચારો શરમનો માર્યો કોઈ એકશન લઈ શકતો નથી. એ ગભરાય છે એમ પણ કહી શકાય ! આવા કોઈ છોકરાઓ આ લેખ વાંચનારમાંથી હો તો જરા ચેતી જજો, સાવ મૂંગામંતર રહેવું ડેંજરસ ! છોકરી ખોઈ બેસવાનું જોખમ ખરું ! અને બીજી વાત એય છે કે છોકરીના મોઢેથી આવા શબ્દો સાંભળવા ગમેય ખરા, એની ના નહીં ! આ તો રસબસ મસ્તીનો પ્રકાર છે.    

મૂંઝાયેલા છોકરા પર છોકરી છવાઈ ગઈ છે. છોકરો કાંઇ બોલતો નથી પણ એના મનની વાત એના રુંવાડા પર લખાયેલી છે. છોકરીની આંખો સાચું પકડી લે છે અને શબ્દો ફૂટે છે, ‘આંખે તો ઠીક રગે રગમાં ‘હ-કાર’,
તોય પૂછું તો કહે; ”ના રે ના” …. પ્રેમની વાતના તો ગ્રંથો રચાય તોય ઓછા પડે, વિષય જ એવો છે પણ એટલું તો લખવું જ પડે કે આ કવિતામાં, ‘તને કોણ કરે પ્રેમ હવે… જા…’ – આ શબ્દો જે શરારત કરે છે એ લાજવાબ છે! આ સાંભળ્યા પછી બેય વચ્ચે ત્યાં ધમાચકડી મચી જાય તો ના નહીં ! શરમાળ પ્રેમીને ઝકજોરીને જગાડવાનો, એના હૈયામાં ભરેલા ભાવોને ઉલેચવાની આ મજ્જાની રીત છે.

એય લખવું જ પડશે કે જેમને અઢી અક્ષરના વરસાદમાં પલળવાનો અનુભવ નથી એ લોકો સુધી આ કવિતા પહોંચવાની નથી અને એ સારું છે ભાઈ, એ લોકો ભલે એમની ગંભીરતામાં ગોબો પાડ્યા વગર સુખેથી સરવાળા-બાદબાકી, હિસાબ-કિતાબ કે પછી જે કરતાં હોય એ કર્યા કરે !

મીડિયાએ કેટલા સારા લેખકો, કવિઓને લોકો સામે રજૂ કર્યા છે ? પહેલાં આવા લોકો કવિતાઓ લખીને ડાયરી ભરતા. એને કોઈ છાપવાવાળું, ક્યારેક મળે ક્યારેક ન પણ મળે ! અનેક સારા કવિ/લેખક ઉગ્યા વગર આથમી ગયા હશે. હવે સમય બદલાયો છે અને એ બાબતમાં સારું થયું છે. છપાવવાની કોઈ ચિંતા જ નહીં. પોતાને જે સૂઝયું એ, રાહ જોયા વગર, લખીને મૂકી દો સ્ક્રીન પર. લખાણમાં દમ હશે તો લોકો વખાણશે ને આપોઆપ પ્લેટફોર્મ સામેથી આવશે. આ દમવાળી કવયિત્રી ચંદ્રા તળાવિયાને, All the best !     

‘કાવ્યવિશ્વ’ને આવકાર

તમે આ છપ્પનભોગનો રસથાળ મોકલાવો છો એ માટે હું ઋણી છું. હરરોજ ઉત્તમ કાવ્યો પીરસવા બદલ વંદન. ‘કાવ્યવિશ્વ’ને જે ઊંચાઈ બક્ષવાની તમારી સંકલ્પનાઓ સાકાર થાય તેવી શુભેચ્છાઓ. ~ કિશોર બારોટ
આપ પણ ‘કાવ્યવિશ્વ’ માટે આપનો પ્રતિભાવ મોકલી શકો છો.     

🌹દિનવિશેષ 31 ઓકટોબર🌹