🔆પંચમ શુક્લ ~ દોરા જેવી🔆

🥀 🥀

દોરા જેવી રાખડી રક્ષા કરે,
ભાઈની સૌ બહેનડી રક્ષા કરે.

ક્યાંક ઢીંકા, લાકડી રક્ષા કરે,
ક્યાંક પવનરી પાવડી રક્ષા કરે.

બહારની ના કોઈ કડવાહટ નડે,
ગોળની એક ગાંગડી રક્ષા કરે.

ખૂલતાં ને બંધ થાતાં દ્વારની,
નાની સરખી આંકડી રક્ષા કરે.

આઠ મહિના આસમાની સાચવે,
ચાર મહિના ચાખડી રક્ષા કરે

ઇન્દ્રિયો, શ્રાવણમાં ચેતી ચાલજો,
શિવની ત્રીજી આંખડી રક્ષા કરે.

સૌના મનની સૌને કરવા દો ફિકર,
આપડું મન આપડી રક્ષા કરે.

~ પંચમ શુક્લ