🔆ઝવેરચંદ મેઘાણી ~ ઝાકળના પાણીનું🔆

ઝાકળનું બિંદુ

ઝાકળના પાણીનું બિન્દુ એકલવાયું બેઠું’તું;
એકલવાયું બેઠું’તું ને સૂરજ સામે જોતું’તું;
સૂરજ સામે જોતું’તું ને ઝીણું ઝીણું રોતું’તું.

“સૂરજ ભૈયા! સૂરજ ભૈયા! હું છું ઝીણું જલબિન્દુ;
મુજ હૈયે તમને પધરાવું, શી રીતે, હે જગબંધુ!
“તમે દૂર વાદળમાં વસતા, સાત અશ્વને કરમાં કસતા,
બ્રહ્માંડોની રજ રજ રસતા ઘૂમો છો, બંધુ!
તમ વ્હોણું મુજ જીવન સઘળું અશ્રુમય, હે જગબંધુ!”

“જલબિન્દુ રે જલબિન્દુ! ઓ નાજુક ઝાકળબિન્દુ!”
સૂરજ બોલે: “સુણ, બંધુ!
હું તો ત્રિલોકમાં ફરનારો, કોટિ કિરણો પાથરનારો,
ગગને ગગને રમાનારો, તેમ છતાં હું તારો તારો,
હે ઝાકળબિન્દુ!

“તોય મને તું વા’લું વા’લું, બાળાભોળા જલબિન્દુ!
તુજ હૈયે હું પોઢી જાણું, હે ઝાકળબિન્દુ!
“તુજ સરીખો નાનકડો થૈને, તુજ અંતરમાં આસન લૈને,
ઇન્દ્રધનુની રમતો રમવા આવીશ, હે બિન્દુ!
“તુજ જીવનમાં પ્રકાશ વાવું, તુજ અશ્રુને હાસ્ય બનાવું.
હે નાજુક બિન્દુ!”

હસ્તે મુખડે સુરજરાણા જલબિંદુમાં જઈ સમાણા
રુદનભર્યા જીવનમાં ગાણા, ગાઈ રહ્યું ઝાકળબિંદુ

~ ઝવેરચંદ મેઘાણી

કેવું નાજુક નમણું ઝાકળ જેવું ગીત !

🌹દિનવિશેષ 28 ઓગસ્ટ🌹 

ચુડિયાં