🔆રાજુલ ભાનુશાલી ~ કેટલી ખખડી ગઈ🔆 

કેટલી ખખડી ગઈ છે ભારથી,
છત ઊભી છે ભીંતના આધારથી!

પ્રણ અધૂરા લઈને આખર ક્યાં જવું ?
જળ કદી બંધાય ના આકારથી.

વેદનાને જો વલૂરી સાંજના,
રાત આખી તરફડી ચિત્કારથી !

સાવ હળવું લાગવા માંડ્યું છે દુઃખ,
કાખમાં તેડી લીધું છે જ્યારથી.

હાથમાં ગાંડીવ ઝાલ્યું એ પછી,
છોછ કૈ પોસાય ના ટંકારથી !

જાતમાંથી જાતને બાતલ કરો,
‘ઓમ’ને ભેદાય ના એંકારથી.

આમ કુંઠાઈને ‘રાજુલ’ શું વળે?
ઘાટ ચડવા દે નવા વિસ્તારથી !

~ રાજુલ ભાનુશાલી

કવિતા અને વાર્તા જેવા સર્જનમાં કાઠું કાઢી ચૂકેલી સર્જક સ્ત્રી.

કેવું મજાનું કલ્પન !
સાવ હળવું લાગવા માંડ્યું છે દુઃખ, / કાખમાં તેડી લીધું છે જ્યારથી.
માતાને બાળકનો ભાર કદી ન લાગે. ઉપરથી એને તેડવામાં હોંશ જાગે. દુખને તેડવાની હોંશ ભલે ન જાગે પણ એને બાળક ગણી લેવાનું તો શક્ય છે.

તો આ શેર પણ નિર્ભેળ સત્ય રજૂ કરે છે,
વેદનાને જો વલૂરી સાંજના, રાત આખી તરફડી ચિત્કારથી !
અનેકોને આ અનુભવ હશે કે સાંજ પછી વિચારો પર બ્રેક જરૂરી છે, એની દિશા બદલવી જરૂરી છે નહીંતર એ રાત બગાડે એ નક્કી….

મજાની ગઝલ.  

***
કવિતા અને કવિતા વિશે આમ વિધવિધ ભૂમિકાએ રહીને ‘કાવ્યવિશ્વ’ પોતાની એક કેડી સ્થાપવા આગળ વધે છે એ જાણી આનંદ. કૃતિપસંદગી અને સામગ્રીની યથાતથતા સર્વોતમ રહેશે તો આવતીકાલે જરૂર એનું એક સ્થાન બનશે. આપને અભિનંદન.- સંજુ વાળા
***

🌹દિનવિશેષ 7 ઓગસ્ટ🌹

તમારા સંતાનના માર્ગદર્શક બનો ~ જગદીશ હિરાણી