🔆હરદ્વાર ગોસ્વામી ~ એક પડઘાનો🔆

એક પડઘાનો પછી પડઘો પડે
મૌનના ઘરનો સીધો રસ્તો પડે.

આયના એના વિષે ઝગડી પડ્યા,
કોઈના ચહેરા વિશે પડદો પડે!

છે લપસણી આજની એવી હવા,
પંખીને પણ ઉડતા ફડકો પડે!

એક લીલી લાગણીને પામવા
એક માણસ કેટલો ઘરડો પડે!

ભીતરે સળગાટ કૈં એવો હતો,
આંખમાંથી આંસુ નહીં, તણખો પડે!

~ હરદ્વાર ગોસ્વામી

વર્તમાન સમયને કવિએ કેવી સરસ રીતે વણી લીધો છે!
‘છે લપસણી આજની એવી હવા, પંખીને પણ ઊડતા ફડકો પડે!’
કશું પણ બોલતાં કે આચરતા સો વાર વિચારવું પડે એવો સમય, ક્યાંક કોઈ ગળે ફાંસલો ના ભરાવી દે!   

અને આ શેર હૃદયની આરપાર ઊતરી જાય એવો,
‘એક લીલી લાગણીને પામવા, એક માણસ કેટલો ઘરડો પડે!’
લીલી લાગણીને પામવા લીલાછમ રહેવું પડે એ પહેલી શરત અને એટલે હૈયે વસંત જાળવવી પડે!!

‘ભીતરે સળગાટ કૈં એવો હતો, આંખમાંથી આંસુ નહીં, તણખો પડે!’
અહીં પણ કવિએ કમાલ કરી છે.. અંદરની અગનએ કેટલી તીવ્રતાથી રજૂ કરી છે! આંખમાંથી આંસુ ને બદલે તણખો! વાહ…

અને યાદ પણ આવે

‘જો હૃદયની આગ વધી ગની, તો ખુદ ઈશ્વરે જ કૃપા કરી
કોઈ શ્વાસ બંધ કરી ગયું, કે પવન ન જાયે અગન સુધી

***
નવું સાહસ સરસ આવકાર પામી રહ્યું જોઈને ખુશી થાય છે. તમે નિત્યનવી સામગ્રી માટે ઉમંગ અનુભવો એવી શુભેચ્છાઓ.~ જયંત મેઘાણી
***

🌹દિનવિશેષ 8 ઓગસ્ટ🌹

ચુનમુન ને કાલુ