🔆તનસુખ શાહ ~ અટકી ગઈ🔆

*એ પછીની વાત છે*                               

અટકી ગઈ ઉંબર ઉપર તું,એ પછીની વાત છે,
બે કદમ આગળ વધ્યો હું, એ પછીની વાત છે.

હાથ પણ ઊંચો કર્યો ‘તો મેં જરા પાછળ ફરી,
મ્લાન હોઠોથી હસી તું, એ પછીની વાત છે.

શૂન્યતામાં સાથ તારી ઓરડો ડૂબ્યો હશે;
આંખથી ઓઝલ થયો હું, એ પછીની વાત છે .

ઝંખવાતી ગઈ હશે પગલાંની ભીની છાપ પણ;
બારીએ બેઠી હશે તું, એ પછીની વાત છે.

દર્દ દિલમાં પણ દુઆ હોઠો ઉપર સો સો રહે;
ભીતરે ઝળહળ થયો હું, એ પછીની વાત છે.

~ તનસુખ શાહ ‘સ્વપ્નિલ’

‘એ પછીની વાત’ – કશુંક થયા પછીની વાત, જેણે હૈયામાં વંટોળ જગાવ્યા અને છતાં કહી ન શકાઈ…..

અને છતાંય અહીં એ તો કહેવાયું જ નથી! ‘એ પછી વાત’થી કવિ અટકી ગયા છે, એ કંઈક પરિસ્થિતી સમજાવે છે બાકી ભાવક ઉપર….

વાત ઉદાસીની છે, વાત પીડાની છે; કેમ કે ઉંબર પર અટકી જવાયું છે, કેમ કે હોઠ પરનું હાસ્ય મ્લાન છે, ફિક્કું છે, કેમ કે આખા ઓરડામાં શૂન્યતા વ્યાપી ગઈ છે, કેમ કે પગલાંની ભીની છાપ પણ ઝંખવાઇ ગઈ છે.  

અને અંતે એક રાહત આપતી વાત કે ‘ભીતરે ઝળહળ થયો હું’….. સૌ જાણે છે કે દુખમાં પણ કેવું સુખ છે, પીડા પણ કેવા પ્રમાણે છે!

🙏🏻આપે ‘કાવ્યવિશ્વ’ની મુલાકાત લીધી, આભાર. પ્રતિભાવ લખશો ને! અને આ સાઇટ subscribe પણ કરશો ને! 🙏🏻

***

‘કાવ્યવિશ્વ’ વિશે વિદ્વાનોના પ્રતિભાવો
સરસ કાર્ય ! મોટું કામ છે ! મહેનત માગશે ! નિયમિતતા જળવાશે તો વાચકો વધશે ને વધુ લોકોને લાભ થશે. ખૂબ શુભેચ્છાઓ ! મદદ ને માહિતીની ક્યારેક જરૂર પડે તો જણાવશોજી ! ઓલ દ બેસ્ટ. ~ મણિલાલ હ. પટેલ

***

🌹 દિનવિશેષ 21 ઓગસ્ટ🌹 

પ્રિય શિક્ષકોને