🔆જયેન્દ્ર શેખડીવાળા ~ પળ વિકટ🔆  

પળ વિકટ વિહ્વળ ઘડી છે, કરગરો
જીભ ૫૨ આવો, શબદ થૈ ફરફરો

માણસો જેવાં જ સપનાં નીકળ્યાં
લોચનો કંપો, હવે તો કરગરો

વૃક્ષ ભ્રમણમાં જીવે તો છો જીવે
પાંદડાં સાથે જીવે છે કરગરો

જીવવા માટે બીજું શું જોઈએ ?
સાંજનો હળવો પવન ને ઝરમરો

એક તો તારું સ્મરણ ને આ સમય
ઝંખના બુઠ્ઠી ને પથ્થર કરકરો

~ જયેન્દ્ર શેખડીવાલા

એક એક શેર જુદું સંવેદનવિશ્વ લઈને પ્રગટે છે ને એમાં પ્રાસયોજના તરત મન મોહી લે એવી.
મત્લાનો શેર જ ભાવકને આશ્ચર્ય પૂરું પાડવા અને ખેંચવા માટે સક્ષમ છે.

પળ વિકટ વિહ્વળ ઘડી છે, કરગરો
જીભ ૫૨ આવો, શબદ થૈ ફરફરો

નાયક વિનવે છે શબદને…..

કેટલી પીડા છે કે આ સપનાં પણ માણસો જેવાં જ દગાબાજ નીકળ્યા! આવાં સપનાં જોનારી આંખો, હવે તારે કાંપવાનો અને થરથરવાનો સમય છે. પ્રથમ બે શેર એક અજાણ પીડાને વ્યક્ત કરે છે તો ત્રીજો શેર કંઈક આશા સાથે આવે છે. હવાનું મર્મર, હવાનું સંગીત તો પાંદડા સાથે જીવે છે. એની નિસ્બત પાંદડા સાથે છે. એને વૃક્ષની પડી નથી! એક મજાની કલ્પના.

વળી ચોથો શેર એક નિરાંત ઊભી કરે છે. જીવવા માટે શું જોઈએ? નાયક પાસે સાવ સહજ અને નૈસર્ગિક જવાબ છે. અલબત્ત આનો જવાબ દરેક પાસે અલગ અલગ હોઈ શકે અને હોય જ પણ નાયકની ઝંખના છે, હળવા વાયરા સાથેની સાંજ અને વરસતી ઝરમર. કવિહૃદય માટે આવું કલ્પન કલ્પી શકાય.

થોડી પીડા અને નિરાશા સાથે નાયક કહે છે, આ સમય તારું સ્મરણ આપે છે પણ મારી ઝંખના એટલી ધારદાર છે નહીં કે મુરાદ બર આવે!    

આખીએ ગઝલમાં પ્રાસાવલિ મુગ્ધ કરે છે. જુઓ, – કરગરો, ફરફરો, થરથરો, ઝરમરો, મર્મરો, કરકરો. કૈંક હટકે આ શબ્દો/પ્રાસયોજના છે. છેલ્લા બે બાદ કરતાં તમામ છે, ઝીણું કંપન ધરાવતી ક્રિયાઓ. ભાવકની આંખ સામે સહજ સ્વરૂપે દૃશ્યમાન થઈ જાય. અને છેલ્લા બે પ્રાસ, ‘મર્મરો,’ ‘કરકરો,’ પ્રાસયોજનાને સંપૂર્ણ કરવા વપરાયા છે, એ ક્રિયાઓ નથી. ‘મર્મરો’ ધ્વનિસૂચક અને ‘કરકરો’ સ્વરૂપસૂચક શબ્દ છે પણ સમગ્ર ગઝલના ભાવવિશ્વમાં વણાવા માટે એ જરાય જુદાં નથી પડતાં. જાણે તમામ પ્રાસનો એક પ્રવાહ વહે છે, બાકીના શબ્દોની અર્થસભરતાને વહન કરતો….   

🙏🏻આપે ‘કાવ્યવિશ્વ’ની મુલાકાત લીધી, આભાર. પ્રતિભાવ લખશો ને! અને આ સાઇટ subscribe જરૂર કરશો.🙏🏻

‘કાવ્યવિશ્વ’ વિશે વિદ્વાનોના પ્રતિભાવો

અત્યંત સુઘડ, જીવને ઠારતું, સદ્ય પરિનિવૃત્તિ સાધી આપતું, શાંતિ અને શાતા દાયક, ઊંચી ગુણવત્તાવાળું સાહિત્યિક તથા સર્જનાત્મક સાહિત્ય માણવાનું આવું વિરલ પ્લેટફોર્મ આપવા બદલ આપનો આભાર. અભિનંદન અને શુભેચ્છાઓ ~ જયેન્દ્ર શેખડીવાળા

🌹 દિનવિશેષ 25 ઓગસ્ટ 🌹 

મેં મારું એકાંત