🔆ગોપાલી બુચ ~ તું ન હતો🔆 -

તું ન હતો ત્યારે પણ હું હું જ હતી
તું હતો ત્યારે પણ હું હું જ હતી,
તું નથી, ત્યારે પણ હું હું જ છું.

જો,
હું જીવું છું.
જીવતી લાશ થઇને નહીં,
તેજ તોખાર, ધબકતો શ્વાસ લઇને જીવું છું.

ઊપરી તોફાનો જોઈ એમ ન માનીશ
કે, હું ઘુમરાઉં છું, વલખાઉં છું, ખળભળું છું
ઊછળતાં સમંદરના મોજાંની જેમ

ના, એ મારું ઉપરી સ્વરૂપ છે.
ભીતરથી હું શાંત છું, સ્વસ્થ છું, સબળ છું.
મારા ચિંતન અને મનનમાં મસ્ત છું.
દરિયાની સ્થિતપ્રજ્ઞ ગહેરાઇની જેમ. ………….

~ ગોપાલી બુચ

દિવ્ય ભાસ્કર @ કાવ્યસેતુ 102 @ 3 સપ્ટેમ્બર 2013 * લતા હિરાણી

નિરાશાની કોઇ વાત નહીં, નિસાસા કે આંસુને કોઇ સ્થાન નહીં, બસ તેજ તોખાર ધબકતો શ્વાસ… એની વાત લઇને આવે છે ગોપાલી બુચ…. કોઇ મનસ્વિતા કે વિદ્રોહ વગર, પૂર્ણ સ્વસ્થતાથી પોતાની વાતને, પોતાની ભાવનાને રજૂ કરનાર આ કવિની સંવેદના ક્યાંક સ્પર્શે છે….

શબ્દો સીધા છે. સરળ છે. પોતાના અસ્તિત્વને કોઇના હોવા, ન હોવા સાથે સંબંધ નથી… હું છું, હું હતી અને હું રહીશ… તું હોય કે ન હોય ! કોઇના પર અવલંબિત, ઓશિયાળું મારું જીવન નથી જ નથી.. સવાલ સામેની વ્યક્તિએ શું કર્યું કે શું ન કર્યું એનો નથી, સવાલ પોતાની આઇડેન્ટીટીનો છે, પોતાની ઓળખનો છે અને એ જળવાઇ રહી છે એનું સુખ છે, એનો સંતોષ છે. એવું નથી કે દુખ નથી પડ્યું, એવું નથી કે જીવનમાં તોફાનો નથી આવ્યા.. નૈયા કદાચ ડગમગી હશે પણ આખરે એ પાર ઉતરી છે કેમ કે પોતાનું સુકાન પોતાના હાથમાં છે !!

ઉપરથી ક્યારેક વમળ, ઘુમરીઓ દેખાય છે, વલવલાટ છે પણ એ માત્ર બાહ્ય રૂપ છે. ઉપરનું આવરણ છે. ક્ષણિક આવેગ છે. ખરેખર મનમાં તો ઊંડી શાંતિ છે, સ્વસ્થતા છે. દરિયામાં ઉપર જ ખળભળાટ હોય છે, મોજાં અને ભરતી-ઓટ એનું ઉપરી સ્વરૂપ છે. અંદર ગહેરાઇમાં તો હોય છે સ્થિતપ્રજ્ઞતા અને પૂર્ણ સ્વસ્થતા….

અધ્યાત્મ કહો કે ચિંતન કહો, એ કહે છે કે જે અંદર છે તે જ બહાર પ્રદર્શિત થાય છે. એને ઢાંકી શકાતું નથી, છુપાવી શકાતું નથી, રોકી શકાતું નથી.. પરંતુ દરેકનું પોતાનું એક આગવું સત્ય હોય છે. દરેકનો એ અધિકાર છે અને એને એ પ્રમાણે જીવવાનો પણ… કવિતાનું એક સત્ય છે, એ કલાનું સત્ય છે. ભલે એ કોઇ ચોક્કસ ક્ષણનું હોય, ચોક્કસ સમયનું હોય. સમયના એ ટુકડાનો, ક્ષણોના એ દ્વિપનો આકાર મનમાં, શબ્દોમાં, સર્જનમાં ચિતરાઇ જાય છે, કોતરાઇ જાય છે અને પછી એ સ્વરૂપે જીવ્યા કરે છે….

‘કાવ્યવિશ્વ’ને આવકાર

ખૂબ આભાર લતાબેન કે ‘કાવ્યવિશ્વ’ સમક્ષ મને દોરી લાવ્યાં. ‘કાવ્યવિશ્વ’નું સ્વરૂપ એટલું સ્પષ્ટ અને સહજ છે કે વાંચતાં જ મનમાં સમાઈ ગયું. જે બાર વિભાગો તમે નિયત કર્યા છે તે પણ કાબિલેદાદ છે. નિયમિત મુલાકાત લેવી ગમે એવું સુંદર ‘કાવ્યવિશ્વ’ ~ સરલા સુતરિયા
આપ પણ ‘કાવ્યવિશ્વ’ માટે આપનો પ્રતિભાવ મોકલી શકો છો.