🔆માર્ગી દોશી ~ ગમા-અણગમાના🔆

ગમા-અણગમાના મૂક્યા સૌ ઉધામા,
ભણાવી દીધાં મનને સ્વીકારનામાં.

હશે ક્યાંક મારામાં ઓછાપણું પણ,
હવે કોશિશો માંગી રહી છે વિસામા.

નવી રીત શોધી છે હળવા થવાની,
લખી દઉં છું કોઈને કાગળ નનામા!

હતાં બે‘ક સ્વપ્નો ને ગમતા પ્રસંગો,
મૂકીને ગયા તેઓ પણ રાજીનામાં.

સફળ પ્રેમને એ નજરથી જુએ સૌ,
કર્યાં હોય જાણે ગજબ કારનામા.

વિચારું તને ને ઉપાડું કલમને,
પછી રોકવાના પ્રયાસો નકામા.

એ બે જણને પોતાના ના હોય પ્રશ્નો
ત્રીજાની જ વાતે ચડે સામસામા.

ભલેને છૂપાવે ગુના એ જગતથી,
અરીસા ઉપર રહી જવાનાં ચકામાં.

~ માર્ગી દોશી

નિરાશાની ગઝલ.
સ્વીકારનામા એક અસ્વીકારની જાહેરાત બની જાય….

પોતાની મર્યાદા ત્યારે સ્વીકારી શકાઈ છે કે જ્યારે કોશિશો પણ અંતિમ હદ સુધી થઈ ગઈ છે!

આમ જુઓ તો ભાવ એ જ છે પણ રજૂઆત નવીન છે અને એટલે વાંચતાં જ ગમી જાય છે.

‘વિચારું તને ને ઉપાડું કલમને, પછી રોકવાના પ્રયાસો નકામા.’ – અંદરના ઉભરાને ઠાલવવાની અને એને ઠલવાતા ન રોકી શકવાની કેવી અસરદાર રજૂઆત!

‘એ બે જણને પોતાના ના હોય પ્રશ્નો / ત્રીજાની જ વાતે ચડે સામસામા.’ અહીં વાસ્તવિકતાની વાત કરી છે. ક્યાં આવું નથી બનતું???

માણસ ગમે એટલો સજ્જન દેખાવાનો પ્રયાસ કરે પણ એનું હૃદય જાણે છે, એનો આત્મા સાક્ષી છે, એના પોતાના કારનામાનો !

‘કાવ્યવિશ્વ’ને આવકાર

રોજ નવી રચનાઓ દ્વારા નવા ભાવવિશ્વમાં ફરવાનો મોકો આપી આપ અમને ધન્ય કરો છો. ~ ઊર્વી પંચાલ

🌹દિનવિશેષ 21 ઓકટોબર🌹